Miyurbingwui Khonkazār
Okathuiwui awungabing kala miyurbingna ithumwui Avā kala awui Thao Neomi Kahaiawui mungkhangai shaokhai khavai ngasanngaruma. Ana mana̱roa, awui Awunga chi Zionli pamsanga, kala miyurbing ali ngasāmia. Chiwui thili psalm hina khamungabingli chithemia: kashuklu, kala atam lei tharan ali ngayinlu.
2 1Khisāda miyurbingna malungvātkhala, kala mibingna aremawui ot phaningphāphākhala? 2Okathuiwui awungabingna ngarānhaira, kala khamungabingna kazip ngarumda, ithumwui Avā kala awui Thao Neomi Kahaiali mamayāmada ngasanngaruma. a a v2 Thao Neomi Kahaia—Khrista—chi Jishuna. Haokaphok tharanwui kakhapbingna ana̱li mamayāmada kazip ngaruma khamungabing chiwui mawora, hi lā chi eina ngakhahaowa (Pakhangaibingwui Thingkashok 4:25-27). 3"Athumna ithumli chaikahai khalap chi sāshatmisa," da athumna hānga, "kala athumwui khara̱ chi ithumwui eina chihohaosa."
4Kazingram wungpamkhongli chipam kahai ithumwui Avāna mana̱rora; Proho Avāna athumli mana̱shira. 5Chiwui thili ana awui malungkhavāt eina athumli hāngra, kala awui malungkathui eina athumli sāmachitra:
6"I khalattana iwui awunga chi Zionli, iwui kathara kaphungli, pamsanghaowa."
7Ina ithumwui Avāwui shiyan chi phongshokra: ana ili hānga, "Na iwui Anaomayarana; aja ina nawui Avā ngasāhaira. b b v7 Hi chi ithumwui Avāna Anaomayarali hāng katang makhavai shiyanna. Kadhara Tuingashit Lairikna hi tuibing chi phunngaset eina Jishuli chatuira—Pakhangani 13:33, Hebrew 1:5, kala Hebrew 5:5—ana chi Avā eina pharākhai Anaomayarana da phongshokra.
8"Ili ngahānlu, kala ina miyurbing chi nawui shimlui ngasāmira, kala okathui akatanga eina tangda nawui sākhangasak ngasāmira. 9Nana athumli mari khāmshui eina sātekmira; nana athumli ham kasaawui ngaleiham thāda akha̱-akhā sāmira."
10Ara chithākha, O awungabing, thangmeilu; hangkachithei nganākhuilu, O okathuiwui khamungabing. 11Ithumwui Avāli khangachee eina otram ngatha̱lu, kala kathira eina ringphālu. 12Anaomayarali khamaya̱ sālu, maningkha ana malungvātra kala nathum shongfali shimānhaora, khikhalajila awui malungkhavāt hunkhawui alungli ngathunghaora. Ali ngayinkakhuia saikora sokhamina. c c v12 Lā hi Anaomayara—Jishu—li ngayinkakhui sāwui eina mangmāhaowa. Ali tangsā chi, ali wungli tongngasāwui Avāna kokli khangalāsāhaowui china.
