Khangazanabingli Katheia Chi
Laa khamungapāwui vang. Davidwui laa akha.
Kazat eina pikhui tharan kasā seihā akha, kashit akhali shitsangda: kachāmbingli phaningkhamiwui vang ithumwui Avāna kanmira. Ali yangkhavai rākabingna tuitak ngarumkhuida shokthuilaga pangmeira; khangararbingna ana kharāngkha shira da phaningchinga. Kakhanang kaphāmei chiya ana shitkasanga, awui zāt kazā ngasotnao china.
41 1Khangazanabingli phaningkhami chi sokhamina; kakhanang atamli ithumwui Avāna ali kanmira. 2Ithumwui Avāna ali yonda kharing eina keimira; ana ngaleili sohaipa da hora. Nana ali awui yangkashebingwui kaphaningli mahorsangmimana. 3Ithumwui Avāna ali awui petli yangmira; awui kazāli nana ali phasākaphā katonga ngasakmira.
4Iva, ina hānga, "O iwui Avā, ili lumashanmilu; ili raimilu, kaja ina nawuitungli morei sāhaira." 5Iwui yangkashebingna iwui maramli makaphā tui hānga: "Karankha a thida awui ming shimānrakhala?" 6Khipākha ili theikhavai rā tharan, ana arema tui hānga, awui wuklungli ana khamashāt tui kazipkhui; chithāda ana shokhailaga khamashāt tui ngayao ngasaka.
7Ili yangkakharing saikorana ngarumda iwui maramli akhonnao eina ngazeka; athumna iwui vang zakkashi khangarān sāzata. 8"Kathiwui ot akha awuitungli heirorhaira; kapi kahai apam eina ana latluida mangakarthuimara." 9Iwui theikakasaiya ngasotnao, ina shitsanga chi einala, iwui kashakazā kazā chi, ili maramli mai ngareithuihaira. a a v9 Ali horsangmi arui ngayāli Jishuna laa tui hi hānga, awui kashakazā ngarum zalaga chithāda awui maramli mai ngareithuia ngasotnao chi Judasna da mingmi (John 13:18).
10Kha nava, O iwui Avā, ina athumli tandi khami khavai, ili lumashanmilu kala ili ngakarthuimilu. 11Nana ili mathāna kaji hi eina ina thei: iwui yangkashena iwuitungli mathānda mavaimana. 12Iva, nana ili iwui ningsākhangazip alungli singmira, kala nana ili nawui mangāli katang makhavai sākhuira.
13Katang makhavaiwui eina katang makhavai, ithumwui Avāli soranu. Amen, Amen.
