Ngalei Kongluinai Tharan
Laa khare sākhamewui vang. "Kadharawui Timrāwon" laawui athishurda. Davidwui sinā laa lairik, tamchitheiwui vang, ana Aram Naharaim eina Aram Zobahli leilakha, kala Joabna latunglaga Machi Tampākli Edomnaobing thoukai tharāda khani sāthata tharan.
Raiwui ngaparhaida yurna chi tangkhamāng hānga: nana ithumli horchao kahaira, ngalei serkhākhaira, ithumli nganing ngasakpai zam mihaira. Kahāngsangkhami chiya Shechem, Moab kala Edomwui ngalāi ithumwui Avāna awuina da kahāng; kala bichar akha: miwui khangachon aremana.
60 1Ithumwui Avā, nana ithumli horchao kahaira; nana ithumwui raipan sākhayanghaira; nana malungvātlakhaira—ara ithumli khuisangmiluishitlu! 2Nana ngaleili nganuk ngasakhaira; nana chi serkhākhaira. Chiwui khamā za̱da raimilu, kaja chi kongluihaida lei. 3Nana nawui mibingli khānga kachang chi sāchitheihaira; nana ithumli khamalipa ngasak drakhāra̱ mangmihaira. 4Athumna malāwui mangāli chili rangaleng khavai, nana philān chi nali khangachee kasābingli mihaira. a a v4 'Malāwui mangāli' ngahoi chi yangkashena rai ngarar tharan kaji—rai atamli rangaleng khavai philān akha.
5Nawui leikashebing kankhui khavai, nawui yāpang eina ithumli huimilu kala ithumli ngahānkāmilu.
6Ithumwui Avāna katharapamli ngashita: "Ina sochikatra; ina Shechem ngakaira, kala Succothwui Tampāk ngayarshokmira. 7Gilead iwuina, kala Manasseh iwuina; Ephraim iwui kuili kuihonna, Judah iwui khānthingna. 8Moab iwui pangmazikhongna; iwui pheihop chi Edomwuitungli ina haiya; Philistiawuitungli mathānda ina vaowa." b b v8 Ram akhawuitungli pheihop haikahai chi, khare atamli, ram chi iwuina kala ina chitungli mungra da tāngkhamiwui matam akhana.
9Khipāna ili raipan sākahai keinungli thānungra? Khipāna ili Edomli thanvāra? 10Ithumwui Avā, nana ithumli horchao kahai maningmala? Ithumwui Avā, nana ithumwui ashangva̱bing eina ngasoda marāluimara. 11Yangkashebingwui eina ithumli ngachonmilu, kaja miwui ngachonkhami chi aremana! 12Ithumwui Avāli ngasoda ithumna mathālak ot sāra; ithumwui yangkashebingli ana naitāhaora.
