Kathukawui eina Hemanwui Khangakao

Laa akha. Corahwui naomayarabingwui laa lairik akha. Laa kasābingwui akholi, Mahalath Leannoth wui athishurda. Ezrawui Heman wui thangkhamei laa lairik akha.

Kharāmeiwui laa. Hemanna ngashun ngayā kaoa, kathibing eina kaphung, malungkhavāt atungli kharita parda, ana seiha kasā Avāna awui ngasotnaobing khuithuimihaira. Chikhurna phongkhami ngaphāra da ana kasoa, ngahānkā maleimana, kala laa hi yāmkhur lungli ngathum, khangakhui maleimana.

Chapter 88.

Iwui huikhamiwui Avā, ngashunna ina ngakaowa, kala ngayā ina nawui mangāli ngakaowa. Iwui seihā kasā nawui mangāli rāshungranu; iwui khavaoli nakhanā ngareirālu. Kaja iwui manglā kakhanangna pemhaira, kala iwui mirinna Kathewui ramli vānganaiya. Chomli tāzang kahaibingwui ngachaili ili mashithaira; yāng maleila mi akha thāda ina ngasāhaira. Kathibingwui ngachaili chihokahaina, chikhurli kapi sāthat kahaibing thāda, nana mangaphaningunglui kahaibing, kaja athum nawui pāngwui eina katathai kahaina. Nana ili chomwui kathukali haimihaira, tangkhamang pambingli, kathukalungli. Nawui malungkhavātna iwuitungli kharita parza̱da lei, kala nawui khangaphao saikora eina nana ili khuithuihaira.

Nana iwui ngasotnaobingli iwui eina tālak eina khuithuimihaira; athumli khangachee khavai ili sāmihaira. Ili mayāmshok khavai shunghaira; Wukkakhanangna imik mamachāhaira. Zimiksho kachiva̱li ina nali ngakaowa, iwui Avā; ipāng nawui vang hāshokhaira. Kathibingwui vang nana matakhak kahai ot sārala? Achā thikahaibingna nali sochikat khavai ngakarthuira?

Nawui makhangachei leikashi chikhurli phongmira, nawui ning katong Sākashimānli phongmira? ^a Nawui matakhak kahai ot tangkhamangli theisera, lah nawui khamashung khangarong malaihaiwui ngaleili theisera? Kha ina nali ngachonmi khavai ngakaowa, iwui Avā; ngathor iwui seihā kasā nawui mangāli rāhaira. Khisāda, iwui Avā, iwui manglā mayāchinghaokhala? Khisāda namai iwui eina ngathumhaikhala? I nganuilakha eina thuida chotchāng eina kathili nganaihaira, nawui khangachee ina khāngmihaira; ina khāsuthaira. Nawui sākashi malungkhavāt iwuitungli tāshunghaira; nawui ngacheenā ngararra ili sāshimānhaira. Tara̱ kaphong thāda athumna ili zimiksho hupta kuinama; athum katonga eina ili kuinamhaira. Nana leikashe kala khavaknaoli iwui eina tālak eina khuithuimihaira; iwui ngasotnaobing tangkhamangli lei.