Tirülü Khonu Kethiko
Jü kechotheo tsükünu meho thiyice po kesü sayiko: nhümilü khonu kethiko, koro yolü cetamiko mu uphe chotalü mipo nuko, mu pütho kesa thito jülü kelapü kenyomi. Rükhurüe kedeo lüda thüva yo; kiko lhu keta mu zü bade zürü keba mütü jü kechothe celü tso vori.
10 1Khonu kethiko tirü nhümi meho thita die bübü thiyo; sübi kenyo küdopüh kesemi mu müno züh zhoku ta. 2Kesemi melü püzaco peco thüpu bayo, vele kenyomi melü püveco peco thüpu bayo. 3Kenyomi cholü chota tüce ri, pü lüdo bamo, mu pü thüma metüce themu kenyomi zo thi püsheyo. 4Kedeo lekhu noce thosü lize, n tho süo tahite, kekrelamori kezükeve nümo kethi kezhoko thi khata yo.
5Nace züh I mhakesu püh ngoyi ba, kedeo celü kevorio kesü sübizo: 6Kenyo tho kezho kekroce thi südü bayo, vele künemiko tho kürünu lalü ba yo. 7I cetamiko koro yo ba keta ngoyi, mu mipo nuko cetami bi uphe no chota ngoyi. 8Thüma kehopüri tükhülü thoo pü lülü tayo, mu thüma kehopüri sazho vace lize, tenhipüe pü cheyo. 9Thüma kehopüri ketsü kha lize, süe pü methi yo, mu thüma kehopüri sübo vace lize, süe pü vekedi thiyo. 10Merü mha kükreyi lize, mu pü khü za kemoo zori, no keku kekro züho; vele kesemi thi küveo vori yo.
11Tenhipüe bü thi kemotüce pü cheyi lize, bü kemotümi nothi prayi vemo. 12Kesemi kepo pü kenü vori yo, vele kenyomi mülü pü thüva yo. 13Pü kepo thürako kenyo zo, mu pü pode külaco mhakesu saju zo. 14Vele kenyomi po khipü bayo. Dipü vori to sopüe seyomo, mu pü saco dipü bata to sheri sopüe thüma ce po tsoyi ve?
15Kenyomikoe u mhatholü themu thathi thiyo, kekrelamori rüna vo cho sheri uko seyomo. 16No cie-i, cejü, n kedeo natsimi zolü, mu n mipo nuko bavüdoolü tülhü thi yo. 17No küvo, cejü, n kedeo kezhoko nuo zolü, mu n mipo nuko pütü tülü tülhü thiyo— keku kehülü, kedokhri kemola. 18Mhathimütsü lüno rele kerü renu yo, mu be thadzü lüno rele dzü lho yo. 19Tsükhrüdao künyüpüh kehülü thi süyo, mu zue kürhühro nü thiyo, mu rüka mha metü fü küla yo. 20N lüdolü ri kedeo reshu tahite, mu n thezilü ri künemi reshu tahite, kekrelamori tüyo rako n po süyi vo yo, mu mera küba khonu n poo theju süyo.
