Jü Yo Tsükhrida
N tsükhrida jü yo süte, mu n tütha kekro lü kedo süte, kükrelamori dipü mha kemeka vorito no semo. Tükhra ngo kehopüri tsava yomo. Khresao mu pilü n tütso tsa sote, keveo lü nüyite, kezü nha vori keto melü süte, mu Jihovae natsiko mejolü voto süo seyite.
11 1Neko tsükhrida jü yo süte, kükrelamori pütü kekro kevasa neko süo lasa ngoto. 2Thünace kedopü tsüte, mori tütha ce ri, kükrelamori cejüyo dipüh mha kemeka vorito no semo. 3Kemhü jü mezü lize, cejüyo türü süto; mu sübo mekhroco mori mesoco rütu prü lize, süo rütu ketalü, sülü pü bato. 4Tükhra ngo kehopüri tsava yomo, mu kemhü phi kehopüri rüla yomo.
5No tükhra cho semo bi, mori nune thenomi nobulü uro dibi prayi semo bi, sübi de mha metü thi makeba Jihova mhatho no seyi hozo.
6Sütücesü n tsa sote, mu thevalü n be phesa tahite, kükrelamori ka na veto no semo—hio mori süo—mori botho mesü na veto.
Keveo Nyü Zo
7Keveo nyü zo, mu mhü thi nace ngoyi nüphi zo.
8Süla thüma humi tetse kekro rhüh choyi lize, pü süko metülü nenü tate; vele pü zübü pütüko rekra süte, kükrelamori süko kekro tato. Mha metü thi vorikosü pütü dopü zo.
9Khresao, n natsilü nenüyite, mu n natsi pütülü n lüe no kenü tsüte. N lü cholü mu n mhü ngolü tayite; vele mha hiko metü na Jihovae no mejoto, süo seyite.
10Süla n lü celü kemethu hu süte, mu n upho celü kemezhe süte, kükrelamori natsi mu kerhü keshu pütü dopü zo.
