Job 10 FHB Father's Heart Bible™

10 ¹“I atho a rhüketao metha tazo. I a kümüli tsüh de po süto; I a khri kekhulü po süto. ²I Jihova ce po süto: No athi mejo hite; no ditono I züde kemeli, athi seyi te. ³No süsazü shetiba no nü thiyi tome, n bezi mhatho retsü, kürüzüko dorhüko lü no künü süce? ⁴No upho mhüko bato me? Thüma kengo bi no ngoyito me? ⁵N tüsoko thüma tüsoko bizo me, mori n kroko thüma kroko bizo me, ⁶no a kejo phu de a kephoma phuto, ⁷no I kejo mo seba ta zori, mu n be celü athi süphra kesüo mipüri bamo?

⁸“N bezi-e athi hüsü mu athi thi kesüla, a upho metü, vele tsühi no pra de athi müka süto. ⁹No le bi athi thi kesü seba te. Tsühi no athi cejülü retu me? ¹⁰No athi nojü bi pai sümo me, mu chele bi athi küjiva süta mo me, ¹¹püyo mu upho khi athi retso thisü, mu uro mu uthrhiko khi athi thi kesa? ¹²No athi rhü mu kekhrü keta tsükesü, mu n kethoketi a rüpü khrühi va.

¹³“Vele no hiko n lülü müta va, mu hio n mharhü bata I seba: ¹⁴I phoma lize, no athi se vori tato, mu a kejo lüno athi khava süto mo. ¹⁵I kejo ba lize, kesukerho I! Mu I küdimi lize zori, a pükhrü pi süyi kemola—I thenga neshu, a kemezhelü khrüsü. ¹⁶A pükhrü kerekrü süo lize, no losha bi athi phu, mu vathi ungo mhatho athi kütsü thizo. ¹⁷No zhopo kesa athi kütsü cevori, mu n lekhu kekro athi pai süto; müzhie tükhra tükhra athi süce zo.

¹⁸“Süla no ditono athi nobu lü cevori? I kedipü thita, mipü mhü athi mengo sheri I sasü bata lize. ¹⁹I thethi phrabamo bi bata zole, nobu lü celü meza lü mezi de athi vota. ²⁰A tüsoko tsazo mome? Athi lüno pra te, athi tho tate, side I kelu thethi ngoyi te, ²¹I retu kemo dilü vo sheri, kezü mu keso khri ketolü tü lü, ²²kezü ketolü bi thüjüküzü tü lü, keso khri mu kübara lü, keve zori kezü bi kebalü.”