Ɔkra a Ɛyɛ Yaw

Hiob kasa kyerɛ Onyankopɔn tee, na obisa sɛ sobo bɛn na ɔde abɔ no. Nsa a ɛhwie no guu sɛ nufusu na ɛde honam kataa no so no, seesei ɛtɔ no sɛ gyata. Nea ɔsrɛ ara ne sɛ ɔmma ɔnnya ahome bere tiaa bi ansa na wakɔ sum asase so.

Ti 10.

“Me nkwa ho afono me. Mɛka me nwiinwii a minsiw ano; mɛkasa afi me kra mu yaw mu. Mɛka akyerɛ Onyankopɔn se: Mmu me fɔ; ma minhu nea enti a wo ne me di asɛm. Ɛsɔ wʼani sɛ wobɛhyɛ obi so, na woapo wo nsa ano adwuma, bere a wʼani gye amumɔyɛfo nhyehyɛe ho? Wowɔ honam aniwa? Wohu ade sɛnea onipa hu ade? Wo nna te sɛ onipa nna, anaa wo mfe te sɛ ɔbarima mfe, sɛ ɛsɛ sɛ wohwehwɛ me fɔdi, na wotiw me bɔne akyi, ɛwɔ mu sɛ wunim sɛ minni fɔ, na obiara nni hɔ a otumi gye me fi wo nsam?

“Wo nsa nwenee me, yɛɛ me, me ho fa biara, na afei wodan wo ho resɛe me. Kae sɛ wonwenee me sɛ dɔte. Afei wode me bɛsan akɔ mfutuma mu? Ɛnyɛ wo na wohwiee me sɛ nufusu, na womaa me kyenee sɛ kyiisi, wode honam ani ne honam kataa me so, na wode nnompe ne ntini nwenee me boom? Wode nkwa ne apam adɔe maa me, na wo hwɛ abɔ me honhom ho ban.

“Nanso wode eyi siee wo koma mu, na minim sɛ eyi ne wo botae: sɛ meyɛɛ bɔne a, anka worehwɛ me, na anka worenyi me mfi me fɔdi mu. Sɛ midi fɔ a, due me! Na sɛ midi bem mpo a, merentumi mma me ti so—aniwu ahyɛ me ma pa ara, me amanehunu afɔw me. Sɛ mema me ti so a, wotiw me sɛ gyata, na wosan yɛ anwonwade tia me. Wode adansefo foforo ba bɛtia me, na wohwie wʼabufuw pii gu me so; ɔhaw ɛsorɔkye akyi ɛsorɔkye tow hyɛ me so.

“Ɛnde, adɛn nti na woyii me fii awotwaa mu? Anka eye sɛ mewuu ansa na aniwa biara rehu me. Anka mɛyɛ sɛ nea mamma wiase da, na wɔfaa me fii awotwaa mu kɔɔ ɔda mu ntɛm ara. Ɛnyɛ me nna sua? Twe wo ho fi me ho, gyaa me, na manya ahotɔ kakra, ansa na makɔ baabi a wɔnsan mfi hɔ mma bio, akɔ esum ne sunsuma kabii asase so, akɔ kusuuyɛ asase a ɛte sɛ anadwo kabii so, sunsuma kabii ne basabasayɛ asase so, baabi a hann mpo te sɛ esum.”