Khadi ya Moya

Mu kuzonza kwena Nzambi kosu kalewa, Yobi wisi yufula ni ndola nki yina. Moku mana mámphanga hanga mabele amana mámvwatisa ni musuni, buthwena mabati musanda hanga nkosi. Wisi lomba kaka ni basisa yandi ndambu ya tangwa ku thwala kakwenda ku tsi ya mudima yi phipha.

Kapitulu 10.

«Meni yisi menga luzingu lwama. Yiyekula khondu zama bukheti; yizonza mu khadi ya moya wama. Yizimbula kwena Nzambi: Kunzengaku ndola; nzayisa kikuma kya biki wisi tendana yi meni. Dyisi kusephidisa mu kusuna batu, mu kulewula kisalu kya moku maku, bwosu wisi sephila yi bimeka bya batu ba mbi? Weku yi mesu ma musuni? Wisi mona bwosu kisi mona mutu wisi fwa? Bilumbu byaku bifwanani yi bilumbu bya mutu wisi fwa, holo mvula zaku zifwani yi mvula za mutu wa yakala, ndangu wusanda mbi yama amana wulandanda disumu dyama, bwosu ngeyi wisi zaya ni meni yeku yi mbi, amana ka mutu ku wafwana kuhulula meni mu koku kwaku?

«Moku maku mámfwanikisa amana mámphanga meni, mu bitini byama byosu, amana buthwena bwabu wisi baluka amana wisi mfwisa. Tebuka ni wámbumba meni hanga tuma. Buthwena bwabu, wisi vutula meni ku fusyangeni? Abweti wámwanga meni hanga midiki, amana wámbundikisa meni hanga midiki mibundikani, wávwatisa meni lutu yi musuni, amana wátunga meni ni mifufwa yi misinga? Wámpheka luzingu yi khenda ya bulunda, amana lukebolo lwaku lwakebini moya wama.

«Kaasi wásweka mambu mama mu mbundu yaku, amana nzayi ni mama mákala lukanu lwaku: Yuka ni yásumuka, ngeyi wisi nsimbulula amana wulendaku kukatula mbi yama. Yuka ni meni yenina yi mbi, kyadi kwama! Amana yuka ni meni yenina wa kasemi, yilendaku thuta mutu wama—meni yizadi tsoni, ndindama mu kiwayi kyama. Yuka ni yathumba mutu wama ku zilu, wisi ndandanda hanga ngo amana hika wisi hanga bithondu byaku bya bukamvi kwama. Wisi nata bambangi ba pha ba kufunda meni, amana wisi mwanga khabu zaku za lawu kwama; mahuwa ha mahuwa ma biwayi mabwila ha meni.

«Kikuma kya biki, buna, wámbutula mu vumu? Nzodi ni yafwa kedi disu dimosi dyámona meni. Yadi yikala bwosu meni yihangamaku kedi, bánatina meni mbala mosi tukidila mu vumu tii yi kuna kalunga. Abweti bilumbu byama bya khunda, kabwaku? Katuka kwama, yambula meni, ndangu yakala yi tangwa dimosi dya kikesa, kedi yikwenda kuna kwa kukonda vutuka, ku tsi ya mudima yi kivula kineni, ku tsi ya phipha hanga phipha ya lawu yi lawu, ya kivula kineni yi ya mvwalangani, kuna mwini meni wufwanani yi phipha.»