Jobe Püla Pü Se Züthasü

Jihova, pü akemezi kemetsüpü, pü za lü rüshü de, Job-e pü unimiko kematho zo zi lü renyi; pü akematho thi ketala ce khava tamote. Süsa pü atho mesakümo thüma sipü nuta: rüka cejü bi kengu zori kematho süo wü-to, tüsa therü khrüto, mu püki mücü ki bi thipü ce.

Kezhü 27.

Süsa Jobe püla pü jü züthasü de poti: “Jihova, akemezi kemetsüpüo, rhü keba bi, mu akerhüro kükhu thipü kepfüthoo rhü keba bi, akerhü alü keba kesala, mu ha Po rüpü anguhlü keba kesala, ameyi mezi kemoko pomo, mu ase mhakemeho pomo. neko kematho zo I püngo anü tahi; i sa kemothe akematho I khava tamote. I akematho melü ketace khava tamote; ala tüso humi sheri alü ace kemezhe pomo.

Angomumi kesumi bi thiyite, mu ace tavozü matho kemomi bi thiyite. Kekrelamori müsa kemomi khipü düvatüce, pü kemeri dipü zo, Jihovae pü kerhü metsütüce? Jihovae pü se seto me, püyo thomelu voritice? Pü kepfüthoolü anü me? Pü tüso metü Jihova cü me? I neko Jihova be la mütha süto; kepfüthoolü mhakeba I khrümo. Hihe, neko metüe neko sheri hio ngota; süsa dipüla neko mhakemeho jü süsü poba? Hihi Jihova celü kesumi sipü zo, kesu thiko kepfüthoo celü ngo kalü zo: Pü pünuko kropü lize, uko zecholü thelato, mu pü shuyeko khapü künyo süto mo. Pü külayi miko tüsa therü khrüto, mu uko samemiko krato mo. Pü raka cejü bi kengu, mu füne le bi kengu lho, pü kengu lho zori, vele kematho süo wü- to, mu mejo kemoo raka zato. Pü püki mücü ki bi thi meve, kezümi thipü zhonu bi. Pü kenemi bi ta prata, vele püla sübi thimo; pü mükhi khrisa, süo tatato. Kemücheko jüde bi püyo voto; keyilü tükhrae pü zu tato. Nathoco tükhrae pü züthasü de pü tavo; süo pü dolü zu tata. Süe püyo phimezhe kemola lhu süyo; pü süo keku celü hupho vayo. Süe püyo be khrü süyo, mu püyo pü dolü se po tüva süyo.”