Ntha hio ha Po za zo

Kemezi mu meho menyü. Jütho thi süo kethü reshü ceri ha Po nü khamükro zo, mu mhanye kra ce uni shuta lize, neko kra ri fü reni mo tato. Meho menyüe unümomi chüto. Timesü pü po: cetu keresükü lü ba hi küpali thünyi zü ce mütü lü ba ceri kevezo.

Kezhü 21.

Kede kelü hio ha Po khilü jücho bizo; Pue pünü dipüce lize sülü va to. Thüma cho metü themu mhülü jütho bi tayo, vele ha Poe lüdo cüyo. Jütho mu kemezi keto thi süo kethü reshü ceri ha Po nü khamükro zo. Mhü kemeha mu kelü kemeko— mhakesu mi thevoo—kephoma zo. Krokrü mi müdo shuyi ngo shu zoto, vele unümo thiyi mi metü küdi lü tayo. Kemeda miyi lü ketho thi süo unümo khava kütao bi zo, küsa rüh kürüthi zo. Mhakesu mi murimu uko voyi tato, kekrelamori uko kemezi keto thiyi phrasü la. Mha kejomi choo kereviko zo, vele mesa mi süko jütho zo. Küpali thünyi zü ce mütü lü ba ceri, cetu keresükü lü ba kevezo. Mhakesu mi kerhüro mhakesu menyü yo; pü saco mie pü mhülü ngokümüzhie ngomo. Mijüko mi punie lize, mha kümoshemi mhashe ngoyo; somine mi nemedole lize, uko mhase ngoyo. Kemezi mi ha Poe mhakesu mi ce ngoyo, mu mhakesu mi kümüsü lü tasü. Thüma kehopüri küdimi kra ce uni shuta lize, pü ri krayi tato vele fü reni mo tato. Kümükhrühlü khasü mhaküsüo azho thelüsüyo, mu bola lü hüsü presa lüda kezhopü thelüsüyo. Kemezi thi lize, süo kethoo mi la nü zo vele mhakesu thiyi mi la nethipü zo. Mhashe cho celü mürhü tata thüma süo, kesami hu lü relü tato. Unü unyü kekhrümi süo küdimi thi tato; mizü mu nicu kekhrümi süo külhüthe künyemi thimo tato. Mhakesu mi süo kethoo mi la rha thi tato, mu kümüdami süo jütho mi la rha thi tato. Küpali mu umezi kepota thünyi zü ba ceri, kesacejü lü ba kevezo. Ketsü pümakerü bodü mu nicu somine ce lü bazo, vele kümüloo mie pü ba metü ti whüyo. Kemezi mu kemelü kekhrü phuta thüma süo, kerhü, kemezi, mu kemele ngoyi tato. Somine thümao kekumi nade kho keyizo, mu uko melü atüyi retu süyo. Thüma kehopüri pü mü mu pü miyi khüba lize, themu kümüzhe lüno phrayi tato. “Mijüko mi” süo kemeko mu ulü kerekrü kezhopü de thiyi mi za zo. Metsü mi mhaho menyü pu dokhriyo, kekrelamori pü khi yitho thiyi phrasü la. Tüsozho metü mhaho menyü po veyo, vele kethoomie khasüyo mu sülü khüthümo. Mhakesu mi kethü reshü süo ngokemetsü zo— mhakesu kelü de züh vori lize metü ceri khamükro ngokemetsü zoto. Kemeda süsüzhopo mi süo meka tato, vele kehopüri fü reni mi süo kechothe ta süsüzhopo thiyi tato. Mhakesu mie mhüjü thepu shude thiyo, vele jütho mie pü choko medo thi keyizo. Ha Po jüko tosütha küyi mhashe, mhaco mhala, mu müdo ri bamo. Gura hio theri tüso la keredeyi küta, vele kuyi ha Po za zo.