ஆதியாகமம் 26

26 ¹ஆபிரகாமின் நாட்களில் உண்டான முந்தின பஞ்சம் அல்லாமல், அந்த தேசத்தில் மறுபடியும் ஒரு பஞ்சம் உண்டாயிற்று. அப்பொழுது ஈசாக்கு பெலிஸ்தரின் ராஜாவாகிய அபிமெலேக்கினிடத்திற்குக் கேராருக்குப் போனான்.

²எங்கள் பிதா அவனுக்குத் தரிசனமாகி, “நீ எகிப்திற்குப் போகாதே; நான் உனக்குச் சொல்லும் தேசத்தில் குடியிரு. ³இந்தத் தேசத்தில் தங்கியிரு; நான் உன்னோடேகூட இருந்து, உன்னை ஆசீர்வதிப்பேன்; உனக்கும் உன் சந்ததிக்கும் இந்த தேசங்களையெல்லாம் தருவேன்; உன் தகப்பனாகிய ஆபிரகாமுக்கு நான் இட்ட ஆணையை நிறைவேற்றுவேன். ⁴உன் சந்ததியை வானத்து நட்சத்திரங்களைப்போலப் பெருகப்பண்ணி, உன் சந்ததிக்கு இந்த தேசங்களையெல்லாம் தருவேன்; உன் சந்ததிக்குள் பூமியிலுள்ள சகல ஜாதிகளும் ஆசீர்வதிக்கப்படும்; ⁵ஏனெனில், ஆபிரகாம் என் சத்தத்திற்குக் கீழ்ப்படிந்து, என் கட்டளையையும், என் கற்பனைகளையும், என் நியமங்களையும், என் பிரமாணங்களையும் கைக்கொண்டான்” என்றார்.

⁶அப்படியே ஈசாக்கு கேராரில் குடியிருந்தான். ⁷அவ்விடத்து மனிதர் அவன் மனைவியைக் குறித்து விசாரித்தபோது, அவன், “இவள் என் சகோதரி” என்றான்; “ரெபெக்காள் அழகுள்ளவளானதால், இவளுக்காக இவ்விடத்து மனிதர் என்னைக் கொன்றுபோடுவார்கள்” என்று நினைத்து, “என் மனைவி” என்று சொல்லப் பயந்தான். ⁸அவன் அங்கே அநேக நாட்கள் தங்கியிருந்தபின், பெலிஸ்தரின் ராஜாவாகிய அபிமெலேக்கு ஜன்னல் வழியாகப் பார்க்கும்போது, ஈசாக்கு தன் மனைவியாகிய ரெபெக்காளைத் தழுவிக்கொண்டிருக்கிறதைக் கண்டான். ⁹அப்பொழுது அபிமெலேக்கு ஈசாக்கை அழைப்பித்து, “இவள் நிச்சயமாய் உன் மனைவியாயிருக்கிறாளே; பின்னை ஏன் ‘இவள் என் சகோதரி’ என்று சொன்னாய்?” என்றான். அதற்கு ஈசாக்கு, “இவளுக்காக நான் சாகநேரிடும் என்று நினைத்தேன்” என்றான்.

¹⁰அப்பொழுது அபிமெலேக்கு, “நீ எங்களுக்கு ஏன் இப்படிச் செய்தாய்? ஜனங்களில் ஒருவன் உன் மனைவியோடே சயனித்திருக்கக்கூடுமே; அப்பொழுது எங்கள்மேல் குற்றத்தை வருவித்திருப்பாயே” என்றான். ¹¹பின்பு அபிமெலேக்கு எல்லா ஜனங்களையும் நோக்கி, “இந்த மனிதனையாகிலும் இவன் மனைவியையாகிலும் தொடுகிறவன் நிச்சயமாய்க் கொலைசெய்யப்படுவான்” என்று கட்டளையிட்டான்.

¹²ஈசாக்கு அந்த தேசத்தில் விதைத்தான்; எங்கள் பிதா அவனை ஆசீர்வதித்ததால், அந்த வருஷத்தில் நூறத்தனையாகப் பலனடைந்தான். ¹³அந்த மனிதன் மேன்மேலும் விருத்தியடைந்து, மிகவும் செல்வந்தனாகும்வரைக்கும் தொடர்ந்து பெருகினான். ¹⁴அவனுக்கு ஆட்டுமந்தைகளும், மாட்டுமந்தைகளும், திரளான வேலைக்காரரும் இருந்தார்கள்; ஆகையால் பெலிஸ்தர் அவன்மேல் பொறாமைகொண்டார்கள். ¹⁵அவன் தகப்பனாகிய ஆபிரகாமின் நாட்களில் அவன் தகப்பனுடைய வேலைக்காரர் வெட்டியிருந்த கிணறுகளையெல்லாம் பெலிஸ்தர் மண்ணைப் போட்டு நிரப்பிப்போட்டார்கள். ¹⁶அபிமெலேக்கு ஈசாக்கை நோக்கி, “நீ எங்களைப்பார்க்கிலும் மிகவும் பலத்தவனானதால், எங்களைவிட்டுப் போய்விடு” என்றான்.

¹⁷அப்பொழுது ஈசாக்கு அவ்விடத்தைவிட்டுப் போய், கேரார் பள்ளத்தாக்கிலே கூடாரம் போட்டு அங்கே குடியிருந்தான். ¹⁸தன் தகப்பனாகிய ஆபிரகாமின் நாட்களில் வெட்டப்பட்டதும், ஆபிரகாம் மரித்தபின் பெலிஸ்தர் தூர்த்துப்போட்டதுமான தண்ணீர்க் கிணறுகளை ஈசாக்கு மறுபடியும் வெட்டி, தன் தகப்பன் அவைகளுக்கு இட்டிருந்த பேர்களின்படியே அவைகளுக்குப் பேரிட்டான். ¹⁹ஈசாக்கின் வேலைக்காரர் அந்தப் பள்ளத்தாக்கிலே வெட்டி, அங்கே ஊற்றுத் தண்ணீருள்ள ஒரு கிணற்றைக் கண்டார்கள். ²⁰அப்பொழுது கேராரின் மேய்ப்பர் ஈசாக்கின் மேய்ப்பரோடே, “இந்தத் தண்ணீர் எங்களுடையது” என்று வாக்குவாதம் பண்ணினார்கள்; அவர்கள் தன்னோடே வாக்குவாதம் பண்ணினதால், அவன் அந்தக் கிணற்றுக்கு ஏசெக் என்று பேரிட்டான். ^a a v20 ஏசெக் என்னும் பேரின் அர்த்தம் “வாக்குவாதம்” என்பதாம். ²¹பின்பு அவர்கள் வேறொரு கிணற்றை வெட்டினார்கள்; அதைக்குறித்தும் வாக்குவாதம் பண்ணினார்கள்; ஆகையால் அவன் அதற்கு சித்னா என்று பேரிட்டான். ^b b v21 சித்னா என்னும் பேரின் அர்த்தம் “விரோதம்” என்பதாம். ²²பின்பு அவன் அவ்விடத்தைவிட்டுப் போய், வேறொரு கிணற்றை வெட்டினான்; அதைக்குறித்து அவர்கள் வாக்குவாதம் பண்ணவில்லை; ஆகையால் அவன், “இப்பொழுது எங்கள் பிதா நமக்கு இடமுண்டாக்கினார்; இந்த தேசத்திலே நாம் பலுகுவோம்” என்று சொல்லி, அதற்கு ரெகொபோத் என்று பேரிட்டான். ^c c v22 ரெகொபோத் என்னும் பேரின் அர்த்தம் “இடம்” அல்லது “விசாலமான இடங்கள்” என்பதாம்.

²³பின்பு அவன் அவ்விடத்தைவிட்டு பெயெர்செபாவுக்குப் போனான்.

²⁴அன்று இராத்திரியில் எங்கள் பிதா அவனுக்குத் தரிசனமாகி, “நான் உன் தகப்பனாகிய ஆபிரகாமின் தேவன்; பயப்படாதே, நான் உன்னோடேகூட இருக்கிறேன்; என் ஊழியக்காரனாகிய ஆபிரகாமினிமித்தம் நான் உன்னை ஆசீர்வதித்து, உன் சந்ததியைப் பெருகப்பண்ணுவேன்” என்றார்.

²⁵அங்கே அவன் ஒரு பலிபீடத்தைக் கட்டி, எங்கள் பிதாவின் நாமத்தைத் தொழுதுகொண்டு, அங்கே தன் கூடாரத்தைப் போட்டான்; அவ்விடத்திலே ஈசாக்கின் வேலைக்காரர் ஒரு கிணற்றை வெட்டினார்கள்.

²⁶அப்பொழுது அபிமெலேக்கு தன் ஆலோசனைக்காரனாகிய அகுசாத்தையும், தன் சேனாபதியாகிய பிகோலையும் கூட்டிக்கொண்டு, கேராரிலிருந்து அவனிடத்திற்கு வந்தான். ²⁷ஈசாக்கு அவர்களை நோக்கி, “நீங்கள் என்னைப் பகைத்து, உங்களிடத்திலிருந்து என்னைத் துரத்திவிட்டிருந்தும், என்னிடத்தில் ஏன் வந்தீர்கள்?” என்றான்.

²⁸அதற்கு அவர்கள், “தேவன் உம்மோடே இருக்கிறார் என்பதைத் தெளிவாய்க் கண்டோம்; ஆகையால், ‘நமக்குள்ளே, அதாவது எங்களுக்கும் உமக்கும் நடுவே ஒரு ஆணை உண்டாகவேண்டும்; உம்மோடே உடன்படிக்கை பண்ணிக்கொள்வோம்’ என்று சொன்னோம்; ²⁹நாங்கள் உம்மைத் தொடாமல், உமக்கு நன்மையே செய்து, உம்மைச் சமாதானத்தோடே அனுப்பிவிட்டதுபோல, நீரும் எங்களுக்குப் பொல்லாப்பு ஒன்றும் செய்யாதிருக்கவேண்டும்; இப்பொழுது நீர் தேவனால் ஆசீர்வதிக்கப்பட்டவராயிருக்கிறீரே” என்றார்கள்.

³⁰அப்பொழுது அவன் அவர்களுக்கு ஒரு விருந்துபண்ணினான்; அவர்கள் புசித்துக் குடித்தார்கள். ³¹மறுநாள் அதிகாலமே எழுந்து, ஒருவருக்கொருவர் ஆணையிட்டுக்கொண்டார்கள்; பின்பு ஈசாக்கு அவர்களை அனுப்பிவிட்டான்; அவர்கள் அவனிடத்திலிருந்து சமாதானத்தோடே போய்விட்டார்கள். ³²அன்றையதினமே ஈசாக்கின் வேலைக்காரர் வந்து, தாங்கள் வெட்டின கிணற்றைக்குறித்து அவனுக்கு அறிவித்து, “தண்ணீர் கண்டோம்” என்றார்கள். ³³அப்பொழுது அவன் அதற்கு சேபா என்று பேரிட்டான்; ஆதலால் அந்த ஊரின் பேர் இந்நாள்வரைக்கும் பெயெர்செபா என்று வழங்கிவருகிறது. ^d d v33 சேபா என்பதின் அர்த்தம் ‘ஆணை’ என்பதாம்; பெயெர்செபா என்பதின் அர்த்தம் ‘ஆணையின் கிணறு’ என்பதாம்.

³⁴ஏசா நாற்பது வயதானபோது, ஏத்தியனாகிய பேரியின் குமாரத்தியாகிய யூதீத்தையும், ஏத்தியனாகிய ஏலோனின் குமாரத்தியாகிய பஸ்மாத்தையும் விவாகம்பண்ணினான். ³⁵இவர்கள் ஈசாக்குக்கும் ரெபெக்காளுக்கும் மனதுக்கமாயிருந்தார்கள்.