ஆதியாகமம் 7

7 ¹பின்பு எங்கள் பிதா நோவாவை நோக்கி, “நீயும் உன் குடும்பத்தார் அனைவரும் பேழைக்குள் பிரவேசியுங்கள்; ஏனெனில் இந்தச் சந்ததியில் எனக்கு முன்பாக நீ நீதிமானாய் இருக்கக் கண்டேன். ²சுத்தமான ஒவ்வொரு மிருகத்திலும் ஆணும் பெண்ணுமாக ஏழேழு ஜோடிகளையும், சுத்தமல்லாத மிருகங்களில் ஆணும் பெண்ணுமாக ஒரு ஜோடியையும் உனக்காக எடுத்துக்கொள். ³பூமியெங்கும் சந்ததியை உயிரோடு காக்கும்படி, ஆகாயத்துப் பறவைகளிலும் ஆணும் பெண்ணுமாக ஏழேழு ஜோடிகளை எடுத்துக்கொள். ⁴இன்னும் ஏழு நாட்களில், நான் பூமியின்மேல் நாற்பது பகலும் நாற்பது இரவும் மழையைப் பொழியப்பண்ணி, நான் உண்டாக்கின உயிருள்ள யாவையும் தேசத்தின் மேற்பரப்பிலிருந்து அழித்துப்போடுவேன்” என்றார்.

⁵எங்கள் பிதா தனக்குக் கட்டளையிட்டபடியெல்லாம் நோவா செய்தான்.

⁶பூமியின்மேல் ஜலப்பிரளயம் வந்தபோது நோவா அறுநூறு வயதுள்ளவனாய் இருந்தான். ⁷அவனும், அவனுடைய குமாரரும், அவன் மனைவியும், அவன் குமாரரின் மனைவிகளும் ஜலப்பிரளயத்திற்குத் தப்பும்படி அவனோடேகூடப் பேழைக்குள் பிரவேசித்தார்கள். ⁸சுத்தமான மிருகங்களிலும், சுத்தமல்லாத மிருகங்களிலும், பறவைகளிலும், பூமியின்மேல் ஊர்வன யாவற்றிலும், ⁹எங்கள் பிதா நோவாவுக்குக் கட்டளையிட்டபடியே, ஆணும் பெண்ணுமாக ஜோடிஜோடியாய்ப் பேழைக்குள் நோவாவினிடத்தில் வந்தன. ¹⁰ஏழு நாட்கள் சென்றபின்பு, ஜலப்பிரளயம் பூமியின்மேல் வந்தது. ¹¹நோவாவின் ஆயுசின் அறுநூறாம் வருஷம் இரண்டாம் மாதம் பதினேழாந் தேதியாகிய அந்நாளிலே, மகா ஆழத்தின் ஊற்றுக்கண்கள் யாவும் பிளந்து, வானத்தின் மதகுகள் திறவுண்டன. ¹²நாற்பது பகலும் நாற்பது இரவும் மழை பூமியின்மேல் பெய்தது.

¹³அந்நாளிலேதானே நோவாவும், நோவாவின் குமாரராகிய சேமும், காமும், யாப்பேத்தும், அவர்களோடே நோவாவின் மனைவியும், அவனுடைய குமாரரின் மூன்று மனைவிகளும் பேழைக்குள் பிரவேசித்தார்கள். ¹⁴அவர்களும், தங்கள் ஜாதியின்படியே சகல காட்டுமிருகங்களும், தங்கள் ஜாதியின்படியே சகல நாட்டுமிருகங்களும், தங்கள் ஜாதியின்படியே பூமியின்மேல் ஊரும் யாவும், தங்கள் ஜாதியின்படியே சகல பறவைகளும், சிறகுள்ள யாவும் பிரவேசித்தன. ¹⁵ஜீவசுவாசமுள்ள மாம்சமான யாவும் ஜோடிஜோடியாய்ப் பேழைக்குள் நோவாவினிடத்தில் வந்தன. ¹⁶எங்கள் பிதா அவனுக்குக் கட்டளையிட்டபடியே, சகல மாம்சத்திலும் ஆணும் பெண்ணுமாய்ப் பிரவேசித்தன; பின்பு எங்கள் பிதா அவனை உள்ளே அடைத்தார். ¹⁷ஜலப்பிரளயம் நாற்பது நாள் பூமியின்மேல் இருந்தது; ஜலம் பெருகி, பேழையை மேலே தூக்கி, அது பூமிக்கு மேலாக மிதந்தது. ¹⁸ஜலம் பூமியின்மேல் மிகுதியாய்ப் பொங்கிப் பெருகியது; பேழை ஜலத்தின் மேற்பரப்பில் மிதந்தது. ¹⁹ஜலம் பூமியின்மேல் இன்னும் அதிகமதிகமாய்ப் பெருகி, வானத்தின்கீழ் எங்குமிருந்த உயர்ந்த மலைகளையெல்லாம் மூடிக்கொண்டது. ²⁰ஜலம் மலைகளுக்கு மேலாக ஏறக்குறைய இருபத்திரண்டு அடி உயரமாய்ப் பெருகி, அவைகளை மூடிக்கொண்டது. ²¹அப்பொழுது பறவைகளும், நாட்டுமிருகங்களும், காட்டுமிருகங்களும், பூமியின்மேல் மொய்த்து ஊரும் சகல ஜந்துக்களும், சகல மனுஷரும் ஆகிய பூமியின்மேல் அசைவாடின யாவும் மாண்டன. ²²வெட்டாந்தரையிலிருந்த ஜீவசுவாசமுள்ள யாவும் மாண்டன. ²³மனுஷர் முதல் மிருகங்கள், ஊரும் பிராணிகள், ஆகாயத்துப் பறவைகள்வரைக்கும், தேசத்தின் மேற்பரப்பிலிருந்த உயிருள்ள யாவையும் எங்கள் பிதா அழித்து, அவைகளைப் பூமியிலிருந்து நீக்கிப்போட்டார்; நோவாவும் அவனோடே பேழையிலிருந்தவர்களும் மாத்திரம் மீந்திருந்தார்கள். ²⁴ஜலம் பூமியின்மேல் நூற்றைம்பது நாள் மேற்கொண்டிருந்தது.