சங்கீதம் 103

103 ¹என் ஆத்துமாவே, எங்கள் பிதாவை ஸ்தோத்திரி; என் உள்ளத்தில் உள்ள யாவுமே, அவருடைய பரிசுத்த நாமத்தை ஸ்தோத்திரியுங்கள்!

²என் ஆத்துமாவே, எங்கள் பிதாவை ஸ்தோத்திரி, அவருடைய தயவுகளில் ஒன்றையும் மறவாதே, ³உன் பாவங்களையெல்லாம் மன்னிக்கிறவரும், உன் நோய்களையெல்லாம் குணமாக்குகிறவரும், ⁴உன் ஜீவனைக் கல்லறையிலிருந்து மீட்கிறவரும், உடன்படிக்கை அன்பினாலும் இரக்கத்தினாலும் உன்னை முடிசூட்டுகிறவரும், ⁵நீ உயிரோடிருக்கும் நாளெல்லாம் நன்மைகளால் உன்னைத் திருப்தியாக்குகிறவரும்; இதனால் கழுகைப்போல் உன் யவ்வனம் புதுப்பிக்கப்படுகிறது.

⁶எங்கள் பிதா நீதியை நடப்பிக்கிறார், ஒடுக்கப்படுகிற யாவருக்கும் நியாயம் செய்கிறார்.

⁷அவர் தம்முடைய வழிகளை மோசேக்கும், தம்முடைய செய்கைகளை இஸ்ரவேல் மக்களுக்கும் அறிவித்தார். ⁸எங்கள் பிதா இரக்கமும் கிருபையும் உள்ளவர், கோபிப்பதற்கு தாமதிக்கிறவர், மிகுந்த உடன்படிக்கை அன்பு உள்ளவர். ⁹அவர் எப்போதும் குற்றம் சாட்டமாட்டார், தம்முடைய கோபத்தை என்றென்றைக்கும் வைத்திருக்கமாட்டார். ¹⁰அவர் நம்முடைய பாவங்களுக்குத் தக்கதாக நமக்குச் செய்யவில்லை, நம்முடைய அக்கிரமங்களுக்குத் தக்கதாக நமக்குச் சரிக்கட்டவும் இல்லை. ¹¹பூமிக்கு மேலாக வானங்கள் எத்தனை உயரமாயிருக்கிறதோ, அவருக்குப் பயந்தவர்களுக்கு அவருடைய உடன்படிக்கை அன்பும் அத்தனை பெரிதாயிருக்கிறது; ¹²கிழக்கு மேற்குக்கு எவ்வளவு தூரமாயிருக்கிறதோ, அவ்வளவு தூரமாய் எங்கள் பிதா நம்முடைய பாவங்களை நம்மைவிட்டு அகற்றியிருக்கிறார்.

¹³ஒரு தகப்பனுடைய இருதயம் தன் பிள்ளைகள்மேல் உருகுகிறதுபோல, எங்கள் பிதாவின் இருதயம் அவருக்குப் பயந்தவர்கள்மேல் உருகுகிறது. ¹⁴நாம் எப்படி உருவாக்கப்பட்டோம் என்பதை அவர் அறிவார்; நாம் மண்ணே என்பதை நினைவுகூருகிறார். ¹⁵மனிதனுடைய நாட்கள் புல்லுக்கு ஒப்பாயிருக்கிறது; வெளியின் காட்டுப் பூவைப்போல் அவன் செழித்து ஓங்குகிறான்; ¹⁶காற்று அதின்மேல் வீசினவுடனே அது இல்லாமற்போகிறது; அது இருந்த இடமும் அதை இனி அறியாது. ¹⁷ஆனால் எங்கள் பிதாவின் உடன்படிக்கை அன்போ, அவருக்குப் பயந்தவர்கள்மேல் அநாதிகாலமுதல் என்றென்றைக்கும் நிலைத்திருக்கிறது; அவருடைய நீதி பிள்ளைகளுடைய பிள்ளைகள்வரைக்கும் நிலைக்கும், ¹⁸அவருடைய உடன்படிக்கையைக் கைக்கொள்ளுகிறவர்களுக்கும், அவருடைய கட்டளைகளின்படி செய்ய நினைவுகூருகிறவர்களுக்கும் நிலைக்கும்.

¹⁹எங்கள் பிதா தம்முடைய சிங்காசனத்தை வானங்களில் ஸ்தாபித்திருக்கிறார், அவருடைய ராஜ்யம் எல்லாவற்றையும் ஆளுகிறது.

²⁰அவருடைய வார்த்தையின்படி செய்கிற பலசாலிகளாகிய அவருடைய தூதர்களே, எங்கள் பிதாவை ஸ்தோத்திரியுங்கள், அவருடைய ஒவ்வொரு வார்த்தைக்கும் கீழ்ப்படியுங்கள்! ²¹அவருடைய சித்தத்தின்படி செய்கிற ஊழியக்காரராகிய அவருடைய சேனைகளே, நீங்கள் எல்லாரும் எங்கள் பிதாவை ஸ்தோத்திரியுங்கள்! ²²அவருடைய ராஜ்யம் எங்கும் உள்ள அவருடைய கிரியைகள் யாவுமே, எங்கள் பிதாவை ஸ்தோத்திரியுங்கள். என் ஆத்துமாவே, எங்கள் பிதாவை ஸ்தோத்திரி!