சங்கீதம் 25

25 ¹என் பிதாவே, உம்மிடத்தில் என் ஆத்துமாவை உயர்த்துகிறேன்.

²என் பிதாவே, உம்மை நம்பியிருக்கிறேன்; நான் வெட்கமடையாதபடி செய்யும்; என் சத்துருக்கள் என்மேல் வெற்றிகொள்ளாதபடி செய்யும். ³மெய்யாகவே, உமக்குக் காத்திருக்கிற ஒருவரும் வெட்கமடையமாட்டார்கள்; முகாந்தரமில்லாமல் துரோகம் செய்கிறவர்களே வெட்கமடைவார்கள்.

⁴என் பிதாவே, உம்முடைய வழிகளை எனக்குக் காண்பியும்; உம்முடைய பாதைகளை எனக்குப் போதியும். ⁵உம்முடைய சத்தியத்தில் என்னை நடத்தி, எனக்குப் போதியும்; நீரே எங்கள் பிதா, என் இரட்சிப்பு; நாள்முழுவதும் உமக்குக் காத்திருக்கிறேன். ⁶என் பிதாவே, உம்முடைய இரக்கத்தையும், தொன்றுதொட்டு உள்ள உம்முடைய உடன்படிக்கை அன்பையும் நினைத்தருளும். ⁷என் இளவயதின் பாவங்களையும் என் மீறுதல்களையும் நினையாதேயும்; என் பிதாவே, உம்முடைய தயவுநிமித்தம், உம்முடைய உடன்படிக்கை அன்பின்படியே என்னை நினைத்தருளும்.

⁸எங்கள் பிதா நல்லவரும் செம்மையானவருமாய் இருக்கிறார்; ஆகையால் பாவிகளுக்கு வழியைப் போதிக்கிறார். ⁹சாந்தகுணமுள்ளவர்களை நியாயத்தில் நடத்தி, சாந்தகுணமுள்ளவர்களுக்குத் தம்முடைய வழியைப் போதிக்கிறார். ¹⁰எங்கள் பிதாவின் உடன்படிக்கையையும் அவருடைய சாட்சிகளையும் கைக்கொள்ளுகிறவர்களுக்கு, அவருடைய பாதைகளெல்லாம் உண்மையான அன்பும் உண்மையுமாய் இருக்கிறது.

¹¹என் பிதாவே, உம்முடைய நாமத்தினிமித்தம், என் அக்கிரமத்தை மன்னியும், அது பெரியது. ¹²எங்கள் பிதாவுக்குப் பயந்திருக்கிறவன் யார்? தான் தெரிந்துகொள்ளவேண்டிய வழியை அவனுக்கு அவர் போதிப்பார். ¹³அவனுடைய ஆத்துமா நன்மையில் தங்கியிருக்கும், அவனுடைய சந்ததி பூமியைச் சுதந்தரித்துக்கொள்ளும். ¹⁴எங்கள் பிதாவின் அந்தரங்க சிநேகம் அவருக்குப் பயந்திருக்கிறவர்களுக்கு உரியது; அவர் தம்முடைய உடன்படிக்கையை அவர்களுக்கு அறிவிக்கிறார். ¹⁵என் கண்கள் எப்பொழுதும் எங்கள் பிதாவை நோக்கியிருக்கிறது, அவர் என் கால்களை வலையிலிருந்து விடுவிப்பார்.

¹⁶என்பக்கமாய்த் திரும்பி, எனக்கு இரங்கும்; நான் தனிமையானவனும் சிறுமைப்பட்டவனுமாய் இருக்கிறேன். ¹⁷என் இருதயத்தின் வியாகுலங்கள் பெருகியிருக்கிறது; என் இடுக்கண்களிலிருந்து என்னை வெளியே கொண்டுவாரும். ¹⁸என் சிறுமையையும் என் வேதனையையும் பார்த்து, என் பாவங்களையெல்லாம் நீக்கிவிடும். ¹⁹என் சத்துருக்களைப் பாரும், அவர்கள் அநேகராயிருக்கிறார்கள்; கொடிய பகையினால் என்னைப் பகைக்கிறார்கள்.

²⁰என் ஆத்துமாவைக் காத்து, என்னை விடுவியும்; நான் உம்மை அடைக்கலமாகக் கொண்டிருக்கிறேன், நான் வெட்கமடையாதபடி செய்யும். ²¹உத்தமமும் நேர்மையும் என்னைக் காக்கக்கடவது, நான் உமக்குக் காத்திருக்கிறேன்.

²²எங்கள் பிதாவே, இஸ்ரவேலை அவனுடைய எல்லா இடுக்கண்களிலிருந்தும் மீட்டுக்கொள்ளும்.