சங்கீதம் 33

33 ¹நீதிமான்களே, எங்கள் பிதாவுக்குள் மகிழ்ச்சியாயிருங்கள்; செம்மையானவர்களுக்குத் துதி ஏற்றதாயிருக்கிறது. ²சுரமண்டலத்தால் எங்கள் பிதாவைத் துதியுங்கள்; பத்து நரம்பு வீணையால் அவரைக் கீர்த்தனம் பண்ணுங்கள். ³அவருக்குப் புதுப் பாட்டைப் பாடுங்கள்; ஆனந்த ஆர்ப்பரிப்போடு திறமையாய் வாசியுங்கள்.

⁴எங்கள் பிதாவின் வார்த்தை செம்மையானது, அவருடைய கிரியைகள் யாவும் உண்மையாய்ச் செய்யப்படுகிறது. ⁵அவர் நீதியையும் நியாயத்தையும் விரும்புகிறார்; பூமி எங்கள் பிதாவின் உடன்படிக்கை அன்பினால் நிறைந்திருக்கிறது.

⁶எங்கள் பிதாவின் வார்த்தையால் வானங்கள் உண்டாக்கப்பட்டன, அவைகளின் சர்வ சேனையும் அவருடைய வாயின் சுவாசத்தால் உண்டாயின. ⁷கடலின் தண்ணீர்களைக் குவியலாய்ச் சேர்க்கிறார்; ஆழ்கடல்களைத் தம்முடைய களஞ்சியங்களில் வைக்கிறார். ⁸பூமியனைத்தும் எங்கள் பிதாவுக்குப் பயப்படக்கடவது; உலகத்தின் குடிகள் யாவரும் அவருக்கு அஞ்சி நிற்பார்களாக. ⁹அவர் சொன்னார், அது ஆயிற்று; அவர் கட்டளையிட்டார், அது நிலைபெற்றது.

¹⁰எங்கள் பிதா ஜாதிகளின் ஆலோசனையை வியர்த்தமாக்குகிறார்; ஜனங்களின் திட்டங்களைப் பயனற்றதாக்குகிறார். ¹¹எங்கள் பிதாவின் ஆலோசனை என்றென்றைக்கும் நிலைநிற்கும், அவருடைய இருதயத்தின் திட்டங்கள் தலைமுறை தலைமுறையாய் நிலைத்திருக்கும்.

¹²எங்கள் பிதாவைத் தன் பிதாவாகக் கொண்டிருக்கிற ஜாதி பாக்கியமுள்ளது, அவர் தமக்குச் சொந்த சுதந்தரமாகத் தெரிந்துகொண்ட ஜனங்களே பாக்கியவான்கள். ¹³வானத்திலிருந்து எங்கள் பிதா நோக்கிப் பார்க்கிறார்; எல்லா மனுஷரையும் காண்கிறார். ¹⁴தாம் வாசம்பண்ணும் இடத்திலிருந்து பூமியின் குடிகள் யாவரையும் கண்ணோக்குகிறார். ¹⁵அவர்களுடைய இருதயங்களையெல்லாம் உருவாக்குகிறவர் அவரே; அவர்களுடைய செய்கைகளையெல்லாம் ஆராய்ந்தறிகிறார்.

¹⁶எந்த ராஜாவும் தன் சேனையின் மிகுதியால் இரட்சிக்கப்படுவதில்லை; பலசாலி தன் மிகுந்த பலத்தால் விடுவிக்கப்படுவதில்லை. ¹⁷குதிரை ஜெயத்திற்கு வீணான நம்பிக்கையே; அதின் மிகுந்த பலத்தினாலும் அது இரட்சிக்கமாட்டாது.

¹⁸ஆனாலும் எங்கள் பிதாவின் கண் அவருக்குப் பயந்து, அவருடைய உடன்படிக்கை அன்பின்மேல் நம்பிக்கையாயிருக்கிறவர்கள்மேல் இருக்கிறது, ¹⁹அவர்களுடைய ஆத்துமாவை மரணத்திற்குத் தப்புவிக்கவும், பஞ்சத்திலே அவர்களை உயிரோடே காக்கவுமே.

²⁰நம்முடைய ஆத்துமா எங்கள் பிதாவுக்குக் காத்திருக்கிறது; அவரே நமக்குத் துணையும் நமது கேடகமுமானவர். ²¹அவருடைய பரிசுத்த நாமத்தை நாம் நம்பியிருக்கிறபடியால், நம்முடைய இருதயம் அவருக்குள் மகிழ்ச்சியாயிருக்கிறது. ²²எங்கள் பிதாவே, நாங்கள் உம்மை நம்பியிருக்கிறபடியே, உம்முடைய உடன்படிக்கை அன்பு எங்கள்மேல் இருப்பதாக.