2 Beresosɛm 12 FHB Father's Heart Bible™

12 ¹Bere a Rehoboam ahenni tim na ɛyɛɛ den no, ɔne Israel nyinaa poo yɛn Agya mmara no. ²Rehoboam ahenni afe a ɛto so anum mu no, esiane sɛ wɔanni yɛn Agya nokware nti, Misraim hene Sisak tow hyɛɛ Yerusalem so. ³Ɔde nteaseɛnam 1,200, apɔnkɔsotefo 60,000 ne asraafo a wontumi nkan wɔn fi Misraim bae: Libiafo, Sukifo ne Kusifo. ⁴Ɔfaa Yuda nkurow a wɔabɔ ho ban no, na ɔbaa ara kosii Yerusalem.

⁵Odiyifo Semaia baa Rehoboam ne Yuda mpanimfo a wɔahyiam wɔ Yerusalem esiane Sisak nti no nkyɛn, na ɔka kyerɛɛ wɔn se, “Sɛɛ na yɛn Agya se: Mopoo me, enti me nso magyaw mo ama Sisak.”

⁶Afei Israel mpanimfo ne ɔhene no brɛɛ wɔn ho ase kae se, “Yɛn Agya yɛ ɔtreneeni.”

⁷Bere a yɛn Agya huu sɛ wɔabrɛ wɔn ho ase no, yɛn Agya asɛm baa Semaia nkyɛn se, “Wɔabrɛ wɔn ho ase; merensɛe wɔn, na mmom mɛma wɔn ogye kakra, na mʼabufuw renhwie ngu Yerusalem so denam Sisak so. ⁸Nanso wɔbɛyɛ Sisak nkoa, na wɔahu me som ne asase so ahenni ahorow som.”

⁹Misraim hene Sisak tow hyɛɛ Yerusalem so, na ɔfaa biribiara—yɛn Agya fi no mu ademude ne ahemfi no mu ademude, a sika kɔkɔɔ akyɛm a Salomo yɛe no ka ho. ¹⁰Rehoboam de kɔbere akyɛm sii ananmu, na ɔde hyɛɛ awɛmfo asafohene a wɔwɛn ɔhene fi no ano no nsa. ¹¹Bere biara a ɔhene no kɔ yɛn Agya fi no, awɛmfo no soa akyɛm no, na afei wɔde san kɔ awɛmfo dan no mu. ¹²Bere a Rehoboam brɛɛ ne ho ase no, yɛn Agya abufuw dan fii ne so, na wansɛe no koraa; nneɛma pa bi nso kaa Yuda.

¹³Ɔhene Rehoboam hyɛɛ ne ho den wɔ Yerusalem, na odii hene; na wadi mfe aduanan baako bere a ɔbɛyɛɛ ɔhene no, na odii hene mfe dunson wɔ Yerusalem, kurow a yɛn Agya yii no fii Israel mmusuakuw nyinaa mu sɛ ɔde ne din bɛto hɔ no. Ne na din de Naama a ɔyɛ Amonni. ¹⁴Ɔyɛɛ bɔne, efisɛ wamfa ne koma anhwehwɛ yɛn Agya.

¹⁵Rehoboam nneyɛe, efi mfiase kosi awiei, wɔ odiyifo Semaia ne ɔdehufo Ido nhoma a wɔakyerɛw awo ntoatoaso wom no mu. Rehoboam ne Yeroboam kokoe daa. ¹⁶Rehoboam ne nʼagyanom kɔdae, na wosiee no Dawid Kurow mu; ne babarima Abia na odii hene sii nʼanan mu.