Herode Tow Hyɛ Asafo No So
Herode kum Yakobo na ɔde Petro to afiase. Yɛn Agya bɔfo bi bubu nkɔnsɔnkɔnsɔn no anadwo, na apon bue wɔn ankasa; Petro susuw sɛ ɔresoso dae. Mpaebɔ nhyiam no ase, wɔka kyerɛ abaawa bi sɛ wabɔ dam. Wɔma Herode so sɛ onyame bi, na owu.
12 1Bɛyɛ saa bere no mu, Ɔhene Herode tow hyɛɛ wɔn a wɔyɛ asafo no mufo no bi so, efisɛ na ɔpɛ sɛ ɔha wɔn. 2Ɔmaa wɔde afoa kumm Yakobo a ɔyɛ Yohane nua no. 3Bere a Herode huu sɛ eyi asɔ Yudafo no ani no, ɔkɔɔ so kyeree Petro nso; na eyi sii Apiti Afahyɛ no nna mu. 4Ɔkyeree no de no guu afiase, na ɔde no hyɛɛ asraafo akuw anan a kuw biara mu wɔ asraafo baanan no nsa sɛ wɔnwɛn no, efisɛ na ne botae ne sɛ Twam Afahyɛ no akyi no, ɔde no bɛba nnipa no anim.
5Wɔkoraa Petro wɔ afiase, nanso asafo no de ahoɔden bɔɔ mpae kyerɛɛ yɛn Agya maa no. 6Saa anadwo no, ansa na Herode de no bɛba adi no, na Petro da asraafo baanu ntam, na wɔde nkɔnsɔnkɔnsɔn abien agu no; na awɛmfo a wɔwɔ ɔpon no ano rewɛn afiase no. 7Prɛko pɛ, yɛn Agya bɔfo bi bɛgyinaa ne nkyɛn, na hann hyɛɛ dan no ma. Ɔbɔfo no bɔɔ Petro mfe ho, nyan no, ka kyerɛɛ no se, “Sɔre ntɛm!” Na nkɔnsɔnkɔnsɔn no tetew fii ne nsa ho. 8Ɔbɔfo no ka kyerɛɛ no se, “Hyɛ wʼatade na hyɛ wo mpaboa.” Petro yɛɛ saa. Afei ɔka kyerɛɛ no se, “Fa wʼatade kɛse no bɔ wo ho na di mʼakyi.” 9Enti Petro fii adi dii nʼakyi, na onnim sɛ nea ɔbɔfo no reyɛ no yɛ nokware; na ɔsusuw sɛ ɔrehu anisoadehu. 10Wɔtwaa awɛmfo a wodi kan ne nea ɛto so abien no, duu dade pon a ɛkɔ kurow no mu no ano, na ebuee ne ho maa wɔn. Wofii adi nantew faa abɔnten baako so, na prɛko pɛ ɔbɔfo no gyaw no hɔ kɔe.
11Afei Petro ani baa ne ho so, na ɔkae se, “Afei mahu pefee sɛ yɛn Agya asoma ne bɔfo abɛgye me afi Herode nsam ne nea Yudafo no nyinaa hwɛɛ kwan no mu.” 12Bere a ohuu eyi no, ɔkɔɔ Yohane a wɔsan frɛ no Marko no na Maria fie, baabi a nnipa pii aboaboa wɔn ho ano rebɔ mpae. 13Bere a Petro bɔɔ ɔpon no mu wɔ abrannaa hɔ no, abaawa bi a ne din de Roda baa sɛ ɔrebɛhwɛ nea ɔwɔ hɔ. 14Bere a ohuu sɛ ɛyɛ Petro nne no, nʼani gyee yiye ara ma wammue ɔpon no, na mmom ɔtuu mmirika kɔɔ mu kɔbɔɔ amanneɛ sɛ Petro gyina ɔpon no ano.
15Wɔka kyerɛɛ no se, “Wo bo afu!” Nanso ɔsii so dua sɛ ɛyɛ nokware. Enti wɔkae se, “Ɛyɛ ne bɔfo.” 16Nanso Petro kɔɔ so bɔɔ ɔpon no mu, na bere a wobuee ɔpon no huu no no, wɔn ho dwiriw wɔn. 17Ɔde ne nsa kyerɛɛ wɔn sɛ wɔnyɛ komm, na ɔkyerɛkyerɛɛ wɔn sɛnea yɛn Agya de no fii afiase. Afei ɔkae se, “Monka eyi nkyerɛ Yakobo ne anuanom mmarima ne mmaa no.” Na ɔfii hɔ kɔɔ baabi foforo.
18Bere a ade kyee no, basabasa kɛse baa asraafo no mu wɔ nea ato Petro no ho. 19Bere a Herode hwehwɛɛ no na wanhu no no, obisabisaa awɛmfo no nsɛm, na ɔhyɛɛ sɛ wonkum wɔn. Afei ofi Yudea kɔɔ Kaesarea kɔtenaa hɔ.
Yɛn Agya Bɔ Herode Hwe Fam
20Herode bo fuw Tirofo ne Sidonfo denneennen. Wɔboaa wɔn ho ano baa ne nkyɛn, na wɔnyaa Blasto a ɔhwɛ ɔhene no fie so no sɛ wɔn adamfo, na wɔsrɛɛ asomdwoe, efisɛ wɔn asase de ne ho too ɔhene no asase so maa aduan. 21Da a wɔahyɛ no, Herode hyɛɛ nʼahentade, tenaa nʼahengua so, na ɔkasa kyerɛɛ wɔn. 22Na nnipadɔm no kɔɔ so teɛteɛɛm se, “Eyi yɛ onyame nne, ɛnyɛ onipa de!” 23Prɛko pɛ, yɛn Agya bɔfo bi bɔɔ no hwee fam, efisɛ wamfa anuonyam no amma yɛn Agya; na nsaonsaono weree no, na owui.
24Nanso yɛn Agya asɛm no kɔɔ so nyinii, na ɛtrɛw. 25Bere a Barnaba ne Saulo wiee wɔn som adwuma no, wofii Yerusalem san baa, na wɔde Yohane a wɔsan frɛ no Marko no kaa wɔn ho.
