Bildad Kasa Bio
Bildad ani nnye sɛ wɔbu no sɛ anantwie, na ɔde kasa a wɔasiesie fa amumuyɛfoɔ awieeɛ ho bua: wɔadum ne kanea, afidie aso ne nantin, na n'asefoɔ baako mpo nni nkwa mu. Mfonini biara bɔ ɔbarima a ɔasie ne mma seesei ara so.
18 1Afei Suhini Bildad buae se: 2“Wobɛkɔ so ahwehwɛ nsɛm akosi da bɛn? Da adwene kakra adi, na afei yebetumi akasa. 3Adɛn nti na wɔyɛ yɛn sɛ anantwi, na wobu yɛn nkwaseafo wɔ wʼani so? 4Wo a wode wʼabufuw tetew wo ho asinasin— ɛsɛ sɛ wogyaw asase hɔ wɔ wo nti, anaa wotu ɔbotan fi ne sibea? 5Yiw, wɔdum ɔbɔnefo kanea, na ne gya no ogyaframa duru sum. 6Hann no duru sum wɔ ne ntamadan mu, na kanea a ɛsɛn ne so no dum. 7Wotwa nʼanammɔn a ahoɔden wom no tia, na nʼankasa ne nhyehyɛe bɔne tow no hwe fam. 8Nʼankasa ne nan ka no kɔwura asau mu, na ɔnantew kɔhyɛ ne nhama mu pɛɛ. 9Afiri kyere ne nantin; mfiri bi so no mu denneennen. 10Wɔde hama ahintaw wɔ fam ama no, na afiri twɛn no wɔ ne kwan so. 11Nneɛma a ɛyɛ hu bɔ no hu wɔ afanan nyinaa, na ɛtaa no wɔ nʼakyi pɛɛ. 12Ɔkɔm awe nʼahoɔden, na amanehunu asiesie ne ho retwɛn ne hwe. 13Ɛwe ne honam ani fa bi; owu abakan we ne nipadua akwaa. a a v13 “Owu abakan” yɛ abodin a ɛkyerɛ yare a ekum nnipa na ɛsɛe wɔn nkakrankakra — owu ananmusifo a ne ho yɛ hu sen biara. 14Wotu no fi ne ntamadan a ahobammɔ wom no mu, na wɔde no kɔ ehu hene no anim. 15Ogya tena ne ntamadan mu, ɛnyɛ ne de bio; wɔpete sufre a ɛredɛw gu ne fie so. 16Ne ntini wewe wɔ fam, na ne mman nso wu wɔ soro. 17Ne nkae yera fi asase so, na onni din wɔ abɔnten so. 18Wɔpam no fi hann mu kɔ sum mu, na wɔtaa no fi wiase. 19Ɔnnyaw ba anaa aseni biara wɔ ne nkurɔfo mu, ɔnnyaw obi a wanwu wɔ faako a na ɔte bere bi no. 20Wɔn a wɔwɔ atɔe fam no ho dwiriw wɔn wɔ nea ato no no ho, na wɔn a wɔwɔ apuei fam no ho popo wɔn. 21Ampa, eyi na ɛba amumɔyɛfo atenae so, nea onnim Onyankopɔn no tenabea ni.”
