چاندی جو سات بار تائی گئی
سالارِ مغنیاں کے لیے۔ شمینیت پر۔ داؤد کا مزمور۔
وفادار غائب ہو چکے ہیں اور ہر کوئی دوغلے دل سے خوشامد کرتا ہے۔ زبور نویس درخواست کرتا ہے کہ شیخی باز زبانیں کاٹ دی جائیں، اور اُسے جواب ملتا ہے: چونکہ محتاج کراہتے ہیں، ہمارا باپ کہتا ہے کہ وہ اُٹھے گا۔ اُس کی باتیں سات بار تائی ہوئی چاندی ہیں۔
12 1مدد کر، اے ہمارے باپ، کیونکہ دیندار مٹ گئے ہیں؛ وفادار بنی آدم میں سے غائب ہو گئے ہیں۔ 2ہر ایک اپنے پڑوسی سے جھوٹ بولتا ہے؛ وہ چاپلوس ہونٹوں اور دو دلی سے باتیں کرتے ہیں۔ 3ہمارا باپ سب چاپلوس ہونٹوں کو اور ہر اُس زبان کو جو بڑی بڑی شیخیاں مارتی ہے کاٹ ڈالے، 4جو کہتے ہیں، ”ہم اپنی زبان سے غالب آئیں گے؛ ہمارے ہونٹ ہمارے اپنے ہیں—ہم پر کون خُداوند ہے؟“
5”کیونکہ غریب لوٹے جاتے ہیں، کیونکہ مسکین کراہتے ہیں، اب میں اُٹھوں گا،“ ہمارا باپ فرماتا ہے۔ ”میں اُس کو سلامتی میں پہنچاؤں گا جو اِس کا آرزومند ہے۔“
6ہمارے باپ کے کلام پاک کلام ہیں، وہ چاندی جو مٹی کی بھٹی میں تائی گئی، سات بار صاف کی گئی۔ 7تُو، اے ہمارے باپ، مسکینوں کو محفوظ رکھے گا؛ تُو ہمیں اِس پشت سے ہمیشہ کے لیے بچائے گا۔ 8شریر ہر طرف دندناتے پھرتے ہیں جب بنی آدم میں کمینگی کو سرفراز کیا جاتا ہے۔
