Wazodi wa Mambu ma Bilumbu 19 FHB Father's Heart Bible™

19 ¹Yosafati, kyamvu wa Yuta, wávutuka konda kihonza ku nzu yandi ku Yelusalemi. ²Yehu, mwana wa Hanani mbikudi, wátundakana kyamvu Yosafati amana wumuhyudi: «Ni wena mu kusadisa batu ba mbi amana kuzola bana bisi menga Tata wetu? Kikuma kya bwabuna, khabu za Tata wetu zisi kwisila kwaku. ³Kaasi, mamboti mena mwena ngeyi: wákatula miti mya Asela mu tsi amana wásya mbundu yaku mu kusanda Tata wetu.»

⁴Yosafati wázinga ku Yelusalemi, amana wénda hika hana kati dya batu, tuka ku Beyeleseba tii ku malondi ma Efalayimi, mu kubalumuna mbundu za bawu kwena Tata wetu, Nzambi wa batata bawu. ⁵Wásikununa bazusi mu tsi, muna mbanza zoosu za ngolu za Yuta, mbanza ni mbanza. ⁶Wuzimbudi kwena bazusi: «Talenu mana lwisi hanga—lwisi fundisa ka kikuma kya batu ku, kaasi kikuma kya Tata wetu, amana yandi kenina kumosi yi benu muna kosu dyambu lwisi zenga. ⁷Buthwena, bweya bwa Tata wetu bwakala mwena benu. Kalenu batemuna amana hangenu, mukuma kwena Tata wetu kukondi kukonda kwa masonga, kukondi yekula, kukondi phi kutambula makabu.»

⁸Ku Yelusalemi phi, Yosafati wásikununa ndambu ya balefi, banganga Nzambi yi bambuta ba bikanda bya batata ba Kiseledi, mu kuhana pfundusu ya Tata wetu amana mu kuzenga phaka; bawu bávutuka ku Yelusalemi. ⁹Wábazimbwala: «Hangenu bwabuna, mu bweya bwa Tata wetu, mu bukheti amana yi mbundu yenu yosu. ¹⁰Ha baphangi benu bana bena muna mbanza za bawu balúnata dyambu dya phaka—ditadidi kuhonda kwa batu, holoni ditadidi mitsiku yi mikuku, mitsiku yi mazengu—lubalwengisa, hanga kabakwataku ndola ku thwala ya Tata wetu, amana khabu zakwísa kwena benu yi baphangi benu. Hangenu bwabuna, amana lukwataku ndola. ¹¹Tala, Amaliya, mbuta wa banganga Nzambi, kenina ha thandu yenu muna kosu dyambu dya Tata wetu; Zebadiya, mwana wa Yisimayeli, pfumu wa kanda dya Yuta, muna kosu dyambu dya kyamvu. Balefi bakala hanga basadi ba leta ku thwala yenu. Kalenu ngolu amana hangenu—Tata wetu kakala kumosi yi bana bisi sala mamboti.»