Fesitusi wásambisa Pholu

Pfumu wa kinzunga wamona wátambula milonga, amana mutambu wa khulu wávutuka. Mu kukakamina kuba tumwa ku Yelusalemi, Pholu wálomba ni basambisila yandi kwena Khayisala, amana Fesitusi wásila mawu. Mu diswekamu, Fesitusi wázimbula ni ngyuma yenina kaka kikuma kya mutu wuna wáfwa, khumbu yandi Yesu, wuna Pholu witimya ni wenina moyu.

Kapitulu 25.

Kunima dya bilumbu bitatu bya kutula kwa Fesitusi muna kinzunga, wátombuka ku Yelusalemi tuka ku Sezale. Kwakuna, bambuta ba banganga Nzambi yi bambuta ba Bayuta básongila milonga mya bawu kikuma kya Pholu, amana bákala muheka kikesa, mu kulomba diambu dya mboti kikuma kya yandi, ni kátedisa Pholu ku Yelusalemi; kaasi bakala muleka mutambu mu kumuhonda muna nzila. Fesitusi wávutula ni Pholu muna Sezale kákala mphatika, amana yandi-meni kalubuka tswalu. Wuzimbudi: «Ho yi bwabuna, babana benina yi lulendu hana kati dya benu, bakulunga yi meni amana bamufunda mutu, yuka ni kima kyambi kyena kyandi.»

Fesitusi kánangaku yi bawu kuluta bilumbu bina nana holo kumi; kunima wákulunga ku Sezale. Kilumbu kyalanda, wázakala ha kiti kya kusambisa amana wásenda ni banata Pholu. Ha kátula Pholu, Bayuta bana bátuka ku Yelusalemi bámuzyeta, beka munatina milonga lawu yi myaseri, mina baléndaku kusongila. Pholu wátambula ndinga mu kudikutumuna: «Yisadilaku kima kyambi kwena mitsiku mya Bayuta, keti kwena nzu ya Nzambi, keti kwena Khayisala.»

Kaasi Fesitusi, bwosu kázola ni kabasephidisa Bayuta, wumuhyudi Pholu: «Keti wazóla mu kutombuka ku Yelusalemi ndangu bakusambisila kwakuna kikuma kya milonga myami ku thwala ya meni?»

Pholu wuzimbudi: «Yitelami ku thwala ya kiti kya Khayisala, kuna bufwani bansambisila. Yisadilaku Bayuta kima kyambi, bwosu ngeyi-meni wuzayimya mboti. Ho ni yisadidi kima kyambi, yisadidi kima kifwani lufwa, yitunaku kufwa. Kaasi yuka ni milonga mina babati pfundila batu baba mya phamba, ka mutu ku wufwani kuntambikisa kwena bawu. Yibati lomba kwena Khayisala.»

Kunima dya kubonga lukanu yi kibuka kyandi, Fesitusi wávutula: «Walombidi kwena Khayisala; kwena Khayisala kakwenda.»

Kunima dya bilumbu bihika, kyamvu Angidipha yi Belenisi bakwísa ku Sezale amana bámuheka Fesitusi mboti. Bwosu bánanga kwakuna bilumbu byalawu, Fesitusi wásongila dyambu dya Pholu kwena kyamvu: «Fidikisi wásisa mutu mosi hana muna boloku. Muna tangwa dina yákala ku Yelusalemi, bambuta ba banganga Nzambi yi bambuta ba Bayuta bámufunda, beka undomba ni yibazengila mukanu wa kumuhonda. Yázimbula ni kikalulu kya bisi Loma kyisiku kutambikisa mutu, hangambedi ni mutu wuna babati funda katelama ku thwala ya babana bamufundiki, amana katambula chance ya kudikutumuna kikuma kya mulonga. Ho yi bwabuna, ha bákutakana hana, yízingidilaku; kilumbu kyalanda yávwanda ha kiti kya kusambisa amana yásenda ni banata mutu. Ha bátelama babana bamufundiki, bánatinaku milonga mya mbi mina yákala hingila. Kaasi bákala yi ndambu ya phaka yi yandi kikuma kya bisambu bya bawu amana kikuma kya mutu mosi wa mvumbi, khumbu yandi Yesu, wuna Pholu kakala zimbula ni kenina mu moyu. Bwosu yázimbwadila ni phila yina yizimbula dyambu dyadi, yámuhyula keti wazóla mu kwenda ku Yelusalemi ndangu bakusambisila kwakuna kikuma kya milonga myami. Kaasi bwosu Pholu kálomba ni kamuphatila yuka ni Mpelele kázengila mukanu, yásenda ni bamuphatila tii yi tangwa yifwana kumuhitika kwena Khayisala.»

Angidipha wázimbula kwena Fesitusi: «Nzodi phi ni yíyuka mutu yandi meni-meni.» Fesitusi wuvutudi: «Mbasi kuyuka.»

Pholu watelama ku thwala ya Angidipha yi Belenisi

Kilumbu kyalanda, Angidipha yi Belenisi bakwísa yi khembu ya lawu amana bákota muna nzu ya kinzonzi yi bapfumu ba baphumbulu yi batu ba luzitu ba mbanza. Ha kásenda Fesitusi, hanga banati Pholu. Fesitusi wuzimbudi: «Kyamvu Angidipha, yi benu boosu bana benina hana yi betu, lwamóna mutu wuna. Kanda dyosu dya Bayuta dyámbokwadila kikuma kya yandi, keti ku Yelusalemi keti hana, beka kalunga ngolu ni kafwaniku ni kazinga kedi. Kaasi ha yámona ni kima kimosi kifwani lufwa kyákalaku kwena yandi, amana bwosu yandi-meni kálomba kwena Mpelele, yábonga lukanu lwa kumuhitika. Yenina yi kima kyasikila kyasonikina Pfumu wama kikuma kya yandi; hanga yámunata ku thwala ya benu boosu, theti-theti ku thwala ya ngeyi, kyamvu Angidipha, ndangu kunima dya kumuhyula yimona kima kya kusonika. Mukuma yimweni ni kyisi fwaniku mu kuhitika mutu wa boloku konda kusongila milonga mina bamufundidi.»