Khi kyadi kwena bana bisi kwikila mu Ngiphiti
Baphunda ba Ngiphiti benina kimutu, ka kitembu ku; kuyekamina ha thandu ya bawu kubwisa wuna wisi sadisa yi wuna basadisa kumosi. Tata wetu kenina hanga khosi yina kibuka kya bakalema kilendaku kutinisa, amana hanga banuni bina bisi vevuka ha thandu ya Yelusalemi. Asiliya wisi bwa ni sabala dyikondi kala dya mutu, amana batu bisi loza biteki bya bawu.
Tata wetu kisi zonza mu mavese 4–5, 8–9
31 1Khi kyadi kwena bana bisi kulumuka ku Ngiphiti mu kusanda lusadisu, bana bisi yekamina ku baphunda, bana bisi kwikila mu makalu ma mvita mukuma malawu amana ku bakwa baphunda mukuma benina ngolu za lawu, kaasi batálaku kwena Wuna Watoma wa Kiseledi, Tata wetu, amana basandaku yandi. 2Kaasi yandi phi wenina dimuka amana kanata yambi; kavutulaku ndinga zandi ku nima. Katélama kwena nzu ya bisi mbi amana kwena lusadisu lwa bana bisi hanga mbi. 3Bisi Ngiphiti benina batu, ka Nzambi ku; baphunda ba bawu benina kimutu, ka kitembu ku. Muna tangwa Tata wetu kalámbula koku kwandi, wuna wisi sadisa kabwa kisinza amana wuna basadisa kabwa, amana boosu kumosi bakáfwa.
4Mukuma yeku ndinga Tata wetu kázimbula kwena meni: «Bwosu khosi ho mwana wa khosi wisi kunguma ha thandu ya mbisi yandi—amana ho ni bátedisa kibuka kya bakalema kwena yandi, kayúkaku bweya kikuma kya kukalunga kwa bawu amana kabangaku kikuma kya lufulu lwa bawu—yibwana phi Tata mukwa ngolu zoosu kakúlumuka mu kunwana ha mongu wa Siyoni amana ha kuleya kwandi.» 5Bwosu banuni bina bisi vevuka ha thandu, yibwana phi Tata mukwa ngolu zoosu katánina Yelusalemi; katánina amana kahulula yandi, kahyokila ha thandu yandi amana kaphúlula yandi.
6Luvutuka kwena wuna benu batu ba Kiseledi lwatomene lekama kuna thama kwena yandi. 7Mukuma muna tangwa dina, kosu mutu kalosa biteki byandi bya phalata amana biteki byandi bya wolu, bina moku menu-meni máhangila benu mu disumu.
8Hanga Asiliya kabwa ku mbedi ya phoku yina ka ya mutu ku, amana mbedi ya phoku yina ka ya bana ba batu ku yakádya yandi. Katína ku thwala ya mbedi ya phoku, amana bangunza bandi bakála mu kisalu kya kingolu-ngolu. 9Ditadi dyandi dya ngolu dikábwa kikuma kya bweya, amana bapfumu bandi bakátína kikuma kya bweya ku dibendela dya mvita, kazimbudini Tata wetu, wuna mbawu yandi yenina mu Siyoni amana wuna ziku dyandi dya mbawu dyenina mu Yelusalemi.
