Tata Wusongisi Mbikudi wa Bukamvi
Hananiya kisi zimbula ha mesu ma batu boosu ni muteti wa Babiloni watolukwa muna mvula zodi, amana kisi tolula muteti wa Yelemiya mu kusongila dyawu. Yelemiya kisi vutula Abwabuna, hanga kisi vutuka ni muteti wa bisengu wa Tata wetu mu kifulu kya nti, amana kisi zimbula kwena Hananiya ni kakáfwa mu kikuma kya kulonga batu kukwikila luvunu. Amana bwabuna bwasalama.
Tata wetu kisi zonza mu mavese 13–14, 16
28 1Muna mvula yina, muna luyandiku lwa luyalu lwa Zedekiya, kyamvu wa Yuta, muna mvula ya nya, ngonda ya tanu, mbikudi Hananiya, mwana wa Azolu, mwisi Ngibeyoni, wázimbula kwena meni mu nzu ya Tata wetu, ku thwala ya banganga Nzambi yi batu boosu: 2Pfumu Mukwa ngolu zoosu, Nzambi wa Kiseledi, wuzimbudi: «Yátolula muteti wa kyamvu wa Babiloni. 3Muna mvula zodi, yivutula mu homa haha bilekwa byosu bya nzu ya Pfumu, bina Nebukadinezali, kyamvu wa Babiloni, kábonga haha ku Babiloni. 4Yekonya, mwana wa Yoyakimi, kyamvu wa Yuta, yi batu boosu ba Yuta bana bánata ku kinzenza ku Babiloni, yivutula haha, kazimbudini Pfumu, mukuma yitolula muteti wa kyamvu wa Babiloni.»
5Mbikudi Yelemiya wávutula kwena mbikudi Hananiya ku thwala ya banganga Nzambi yi batu boosu bana bákala telama mu nzu ya Tata wetu. 6Mbikudi Yelemiya wuzimbudi: «Abwabuna! Tata wetu kasala bwabuna. Kazyamisa ndinga zaku zina wábikula, mu kuvutula bilekwa bya nzu ya Tata wetu yi batu boosu ba kinzenza, tukidila ku Babiloni tii yi homa haha. 7Kaasi yuka buthwena ndinga yayi yina yibati zimbula kwena ngeyi yi kwena batu baba boosu: 8Bambikudi bana bátekila betu, tukidila thama, bábikula mvita, yambi yi mvwanzi, kwena makanda ma lawu yi bipfumu bineni. 9Mbikudi wuna wisi bikula ngemba, tangwa ndinga yandi yalungila, buna bazayi ni Tata wetu wámutuma mu kyedika.»
10Amana mbikudi Hananiya wábonga muteti ha tsingu ya mbikudi Yelemiya, amana wáwutolula. 11Hananiya wázimbula kwena batu boosu: «Pfumu wuzimbudi bwabu: Bwabuna yitolula muteti wa Nebukadinezali, kyamvu wa Babiloni, ha tsingu ya makanda moosu, muna mvula zodi.» Amana mbikudi Yelemiya wákatuka.
12Kunima dya Hananiya kutolula muteti ha tsingu ya mbikudi Yelemiya, ndinga ya Tata wetu yisa kwena Yelemiya:
13«Yenda, zimbula kwena Hananiya: Tata wetu wuzimbudi: Ngeyi wátolula miteti mya miti, kaasi wakítula miteti mya kisengu. 14Mukuma Tata Mukwa ngolu zoosu, Tata wetu wa Kiseledi, wuzimbudi bwabu: Yásya muteti wa kisengu ha tsingu ya makanda mama moosu, hanga basadila Nebukadinezali, kyamvu wa Babiloni, amana bakamúsadila. Kinga yámuheka hika bambisi ba mu musitu.»
15Mbikudi Yelemiya wázimbula kwena mbikudi Hananiya: «Yuka, Hananiya! Tata wetu kákuthumaku; ngeyi wásya batu baba bakwikila luvunu.
16Buna Tata wetu wuzimbudi: Yikukatula ha tsi muna mvula yayi; wafwa mukuma wásamuna kukolama kwena Tata wetu.»
17Amana mbikudi Hananiya wáfwa muna mvula yina kaka, muna ngonda ya tsambwadi.
