Yobi Wavutudi ha Mfundu wa Dibombi
Yobi kisi zimbula ni ho kiwayi kyandi kyakala tezwa, kyalúta zitu kuluta tsenga za mayanga, amana ni phunza za Nzambi Kahungu zenina mwena yandi. Kazola ni Nzambi kamumanisa. Kuluta mbi, bakundi bandi bisi muyekula hanga mwanza mya nzanzi mina misi yuma tangwa bankangadi ba phwila bisi kwisa.
6 1Amana Yobi wávutula: 2«Ho ni bakala teza kiwayi kyama, amana batula phasi zama zoosu ha kimosi mu teza! 3Mu kyedika, kyalúta zitu kuluta tsenga za mayanga— kikuma kyaki ndinga zama zakala kisakasaka. 4Mukuma phunza za Nzambi Kahungu zenina mwena meni; kitembu kyama kisi nwa ndikila ya zawu; mambu ma bweya ma Nzambi masindama mu kunwanisa. 5Ane wa tseki kisi kalunga ha thandu ya mwangu wandi, kondilo ngombi kisi kalunga ha thandu ya madya mandi? 6Madya makonda munzenzu masi diwa konda mungwa, kondilo munzenzu wenina mu mamba ma kyimeni kina? a a v6 Mallow yenina kyimeni kya tseki; mamba mandi makala konda munzenzu amana makala disa mbundu—kifwani kya madya makonda ngolu amana makonda luzolu. 7Moya wama wubusa mu kusimba byawu; bima bya mutindu wawu bina madya ma khengu kwena meni. 8Oh, ho ni lulomba lwama lwakala tambika, amana Nzambi kakhana kina yisi zola! 9amana Nzambi kazola kumfukumuna, kakutumuna koku dyandi amana kunzenga! 10Kyaki kyakala kikesa kyama—meni yikina makinu ma kyesi ata muna phasi yina yikondi kyadi—kikuma yibusaku ndinga za Watoma. 11Ngolu zi yina yenina yama, ndangu yikwaminaka mu kivuvu? Amana tsuka yi yina yikungingila, ndangu yisipha mbundu? 12Ngolu zama zi ngolu za matadi? Lutu lwama lwahangama mu kibende? 13Lusadisu luyingilaku mwena meni, buthwena bwabu ngangu za bukheti zakatulwa kwena meni? 14Wosu wuna wakonda buweti kwena nduku wandi, wusisa kuzitisa Nzambi Kahungu. 15Kaasi baphangi bama balámbula hanga muyendisi wa tseki, hanga mikinda mya mayendisi mana misi hulumuna amana misi yuma, 16makala mu phipha mu kikuma kya kyosi kyasi yenga, mazatu mu kikuma kya mvula ya phembi yiswekama, 17kaasi muna tsungi ya kyumu, masi disa; tangwa mwini wisa, masi disa mu homa ha mabwena. 18Bibuka bya banzyendi bisi katuka mu nzila zawu; bisi tombuka ku nganga amana bisi fwa. 19Bibuka bya banzyendi bya Tema bisi sanda mamba; banzyendi ba Seba basia kivuvu mu mawu. 20Báfwa tsoni mukuma bákwikila; bátula ha homa amana bádisadini. 21Buthwena benu phi lwakituka kima kya mphamba; lwamona kima kya bweya amana lwamona wonga. 22Khaku yázimbula: “Nheka kima”? Kondilo: “Hana mfutu wa kweba kikuma kya meni mu kimvwama kyenu”? 23Kondilo: “Nhuluka mu koku dya mbeni”? Kondilo: “Nkula mu luyalu lwa batu bakondi kyadi”? 24Longakenu meni, amana yikala dio; songikenu homa ha yivila nzila. 25Khi phasi ndinga za kyedika zenina! Kaasi mu kyedika, kusongila kwenu kusi songila biki? 26Lwazóla kulwengisa ndinga za mphamba kwandi, ndangu lwabanza ndinga za mutu wakonda kivuvu hanga muphephi? 27Lwáfwana ata mu kubeta zeki ha thandu ya mwana wa nsona amana mu kutekila nduku wenu mosi. 28Kaasi buthwena, yilulombini, talenu meni—khaku yiluvuna ha zizi kyenu. 29Balulenu mbundu, yilubokwadila; kukonda masonga kwahangamaku. Balulenu mbundu—masonga mama makidi telama. 30Ni mbi yina yenina ha lulaka lwama? Munu wama wulendaku kubangumuna kima kya kubunga?»
