Mwana Wenina Pfumu wa Sabata

Kuvela misambu mu kilumbu kya sabata yi kubuka koku dyafwa byanata mifundu, amana Bafwadisi bayandiki kusanda phila yina bamúhondisila, mu kuzimbula ni ngolu zandi zitukidini kwena Belezebuli. Yandi wavutula ni Kipfumu kina kyavambana kyisi bwa, ni mambu misi tungulula mbundu, amana ni wuna wisi hanga luzolu lwa Tata wetu kenina kikanda.

Tata wetu kisi zonza mu mavese 18–21

Kapitulu 12.

Muna tangwa dina, Yesu wáluta mu bilanga bya ngenza muna kilumbu kya sabata. Nzala yábayuka balonguki bandi, buna bayandiki kuhela misambu amana kudya. Buna Bafwadisi bámona bwabuna, bámuzimbwala: «Tala, mu kilumbu kya sabata, balonguki baku babati sala kima kina kisiku fwana!»

Yandi wábazimbwala: «Luatángaku mana káhanga Tavidi, tangwa yandi yi bakundi bandi báyuka nzala? buna kákota mu nzu ya Tata wetu amana wádya mapha ma lumoni, mana mafwaniku kwena yandi yi bakundi bandi, kaasi mafwana kaka kwena banganga Nzambi? Ho luatángaku mu Mitsiku ni muna bilumbu bya sabata, banganga Nzambi muna nzu ya Nzambi babati bola kilumbu kya sabata, kaasi bakonda disumu? Yiluzimbwadi, kinga kyenina haha, kyaluti nzu ya Nzambi. Yuka ni luzaya disongidila dya mambu mama: “Yizola kyadi, heku makabu”, kalufundaku bana bakonda disumu. Mukuma Mwana wa mutu wenina Pfumu wa sabata.»

Kyadi kya Tata Kisi Buka mu Kilumbu kya Sabata

Yandi wákatuka kuna amana wákota mu nzu ya kimvuka ya bawu. Mutu mosi wukala yi koku dyafwa kakala kuna. Bámuzimbwala: «Difwani kubuka mu kilumbu kya sabata?» ndangu bámufunda.

Yandi wábazimbwala: «Nati ha kati dya benu wenina yi mukoku, yuka ni wubwi mu buku muna kilumbu kya sabata, kakonda mukwata yi kulubula? Mutu wuluti mukoku mu mfunu lawu! Buna difwani kuhanga makheti mu kilumbu kya sabata.» Hanga wámuzimbwala: «Yuna koku dyaku.» Wáyuna dyawu, amana koku dyátoma, dyákituka kitoku hanga dyakwawu.

Kaasi Bafwadisi bakatuka amana bákasa kifwandu kya phila yina bakwenda muhonda.

Musadi Wa Luzolu wa Tata

Yesu bwosu kázaya bwabuna, wákatuka kuna. Amana lawu ya batu bámulanda, amana wábabuka boosu, amana wábaheka muswa ni bazimbulaku mutu kikuma kya yandi. Bwabuna bwákala hanga malunga mana mázimbula mbikudi Yesaya:

«Tala, musadi wama—Yesu—wuna yísola, muzola wama wuna moya wama wisi yangalala muna yandi. Yisya Kitembu Kyama hana yandi, amana kazimbula masonga kwena makanda. Kazonzaku keti kabokaku, amana ka mutu ku kayuka ndinga yandi muna mabala-bala. Muswangina wunikama, kakawubolaku, amana muinda wubati zima, kakawuzimaku, tii yi kuna kanata masonga ku kinunga; amana mu khumbu yandi makanda makwíkila.»

Kipfumu Kalendaku Zyamina Kyadíkabisa

Hanga mutu mosi wámunata mutu wukala yi kitembu kya mbi, phofu amana baba; amana Yesu wámubuka hanga kalenda zonza yi kumona. Amana milumba-lumba myosu mya batu myáyituki amana bázimbula: «Yandi yayi kafwana kala Mwana wa Tavidi?» Kaasi buna Bafwadisi báyuka bwabuna, bázimbula: «Yandi yayi kisi kukwasila biphidi-mutu kaka mu ngolu za Belezebula, wuna wenina pfumu wa biphidi-mutu.»

Mukuma yandi wázaya mabanza ma bawu, wábazimbwala: «Kipfumu kyosu, yuka ni kyadíkabisa kyawu yi kyawu, kyazíluka; amana mbanza ho nzu, yuka ni yadíkabisa yawu yi yawu, kayizyamina ku. Amana yuka ni Satana kisi kukwasila Satana, buna wadikabisa yandi meni. Abweti kipfumu kyandi kyazyamina? Yuka ni meni mu hamu dya Belezebula yisi kukwasila biphidi-mutu, bana benu mu hamu dya nati bisi kukwasila? Ihana bawu bakála bazusi benu. Kaasi yuka ni meni mu Kitembu kya Tata wetu yisi kukwasila biphidi-mutu, buna Kipfumu kya Tata wetu kilutudidi kwena benu. Ho abweti mutu kafwana kota mu nzu ya yakala-phandi, amana kanata bima byandi? Yuka ni kakondi tekila kukasa yakala-phandi wuna, kafwaniku. Buna kunima, kalenda yiba byosu bya mu nzu yandi.

Wuna kakala yi meni ku, mutendi wama kena yandi; amana wuna kisi kokila batu yi meni, yandi wisi mwangina. Buna yiluzimbwadi, masumu moosu yi kutukwana kwosu kalolulwa kwena batu; kaasi kutukwana kwa Kitembu kalolulwaku. Wuna kazonza mambu mambi kwena Mwana wa mutu, kalolulwa; kaasi wuna kazonza mambu mambi kwena Kitembu Kyatoma, kalolulwaku ku, ka mu tangwa dyadi ku, keti mu tangwa dina dyakwísa ku.

Kitulenu muti wamboti amana mbutu wandi wamboti; ho kitulenu muti wambi amana mbutu wandi wambi; mukuma muti wisi zayakana mu mbutu wandi. Benu mbandu ya masawa! Abweti lulenda zonza mambu mamboti, bwosu lwenina bambi? Mukuma munwa wisi zonza mana mabasa muna fuka dya mbundu. Mutu wamboti kisi basisa mamboti matukidila mu kimvwama kyandi kya bukheti; amana mutu wambi kisi basisa mambi matukidila mu kimvwama kyandi kyambi. Yiluzimbwadi, muna kilumbu kya pfundusu, batu kavutula mvutu kikuma kya ndinga zoosu za ngyuma zina bazonza, mukuma mu ndinga zaku wakitulwa mutu wa masonga, amana mu ndinga zaku wafundwa.»

Kidimbu kya Yonasi

Hanga balongi ba mitsiku bahika yi Bafwadisi bázimbula: «Mulongi, tuzola kidimbu kwena ngeyi.»

Wávutula: «Mbandu yayi, ya mbi amana ya kisanda, yisi sosa kidimbu. Yamónaku kidimbu kya hika, kaka kyakina kya mbikudi Yonasi. Bwosu Yonasi kákala bilumbu bitatu bya mwini yi phipha tatu mu vumu kya mbisi ya mbuta, phila mosi Mwana wa mutu kakála bilumbu bitatu bya mwini yi phipha tatu mu kati dya tsi. Batu ba ku Ninive batélama mu kilumbu kya pfundusu ha kimosi yi mbandu yayi, amana bayifúnda, mukuma básoba bikalulu bya bawu mu malongi ma Yonasi. Kinga, kima kiluti Yonasi kyenina haha. Pfumu wa mukhetu wa ku banda katélama mu kilumbu kya pfundusu ha kimosi yi mbandu yayi, amana kayifúnda, mukuma wátuka ku tsuka ya tsi kikuma kya kuyuka mudimu wa Solumoni. Kinga, kima kiluti Solumoni kyenina haha.

Tangwa kitembu kya mbi kilubuki mu mutu, kisi luta muna tseki, kisosa homa ha kuvunda, kaasi kimonihoku. Hanga kizimbudi: “Yivutuka muna nzu yama yina yísisa.” Amana bu kyatula, kiwani yawu yakonda kima, yakukombula bukheti yi yakunenga. Hanga kyendi kubonga bitembu bikwawu nsambwadi bya mbi kuluta kyawu meni; byákota amana byazingila kuna, amana mutu wuna kenina mu mambu mambi kuluta ma theti. Yibwabuna phi bwakála kwena mbandu yayi ya mbi.»

Kikanda kya Kyedika kya Tata

Bwosu Yesu kakala kedi zonza kwena milumba-lumba mya batu, ngudi wandi yi baphangi bandi bátelama ku mbazi, bazola kuzonza yi yandi. Mutu mosi wumuzimbwadini: «Tala, ngudi aku yi baphangi baku batelamene ku mbazi, bazola kuzonza yi ngeyi.»

Yandi wávutula kwena wuna wumuzimbwadini: «Nati wenina ngudi ama, amana nati bana benina baphangi bama?»

Amana bwosu kalámbula koku dyandi kwena balonguki bandi, wuzimbudi: «Tala ngudi ama yi baphangi bama! Mukuma, wuna wisi hanga luzolu lwa Tata wama wuna wenina mu mazilu, yandi wenina phangi ama yakala yi phangi ama mukhetu yi ngudi ama.»