Lufwa lwa Yowani Mubotiki
Eloti, wukangama mu ndefi ya mukinzi, wátuma ni babukuna Yowani mutwa. Yesu wákatuka mu kudila, kaasi mulumba-lumba wa batu wámulanda, amana wábadikisa mu mapha matanu. Kunima, Phetelu wákangala ha thandu ya mamba mu kwenda kwena yandi, wámona muphephi, amana wáyandika kutika.
14 1Muna tangwa meni dina, Eloti wuna wákala yala ku Ngadidi wuyuki khululuka ya Yesu. 2Wuzimbudi kwena baphumbulu bandi: «Yandi-wu Yowani Mubotiki, wufutumukini ku bafwa; kikuma kya buna, ngolu zazi zisi sala mwena yandi.» 3Mukuma Eloti wámukwata Yowani, mu miyololu wámukasa amana mu boloku wámukotisa, kikuma kya Elodyadi, mukhetu wa phangi wandi wa yakala Fidiphu, 4mukuma Yowani kakala muzimbwala kwena Eloti: «Kufwaniku ni ngeyi wakala yi yandi.» 5Eloti kakala zola ni kamuhondisa, kaasi wáyuka bweya kikuma kya mulumba-lumba wa batu, kikuma bakala mubongila Yowani hanga mbikudi. 6Kaasi buna kilumbu kya lubutuku lwa Eloti kyatúla, mwana wa mukhetu wa Elodyadi wákina hana mbasi amana wásephidisa Eloti, 7buna wásila lukanu mu ndefi ni kamuheka kyosu kina kalomba. 8Ngudi wandi wumunatisi, wuzimbudi: «Mpheka haha mutwa wa Yowani Mubotiki, ha dilonga.»
9Kyamvu wáyuka kiwayi, kaasi, kikuma kya zindefi zandi yi batu bana kátedisa ku madya, wáhana muswa, 10amana wátuma ni babukuna Yowani mutwa muna boloku. 11Mutwa wandi wánatawa ha dilonga, wáhanawa kwena mwana wa mukhetu, wuna wánata wawu kwena ngudi wandi. 12Amana balonguki ba Yowani bakwísa, bábonga mvumbi amana bámuzika; buna bénda bázimbula kwena Yesu.
Yesu Wadisi Batu Mafunda Matanu
13Buna Yesu káyuka bwabuna, wáyombuka mu masuwa, wénda kuna phungamu, yandi mosi. Kaasi milumba-lumba mya batu myayúka, hanga myámulanda mu malu, tukidila mu mbanza. 14Buna wátuluka mu masuwa, wámona lawu dya batu; kiwayi kyámukwata mukuma wa bawu. Amana bambefu ba bawu, wábabuka. 15Buna kwáyila kuma, balonguki bandi bamuzimbwadi: «Homa thwenina ha tseki, amana kuma phi kuyidini. Sula milumba-lumba mya batu, ndangu benda muna mahata amana badisumbila bima bya kudya.»
16Kaasi Yesu wubazimbwadini: «Bafwaniku kwenda. Benu, lubadisila.»
17Bamuzimbwadi: «Ka kima ku tuna yi haha, kaka mapha matanu yi batsema bodi.»
18Wuzimbudi: «Natenu wawu haha kwena meni.»
19Wásenda milumba-lumba mya batu ni bazakala hana mwangu. Kunima dya kubonga mapha matanu yi batsema bodi, watála ku zilu, wátonda Nzambi, wábukuna mapha amana wáhana wawu kwena balonguki, bawu bahana wawu kwena milumba-lumba mya batu. 20Boosu bádya amana báyukuta, amana bátonguna bitunga kumi yi byodi bya bitini bina byásala. 21Bana badya bákala kitesu kya mafunda matanu ma bayakala, konda kutanga bakhetu yi bana.
Yesu Wákangala ha Thandu ya Mamba
22Muna mbala mosi, wásenda balonguki bandi bakota mu masuwa amana bamutekidila kuna sambwa dikwawu, kithama kina kasúdila yandi-meni milumba-lumba mya batu. 23Kunima dya kusula milumba-lumba mya batu, wénda ku mongu, mu kingenga, ndangu kalombila. Buna kwáyila kuma, yandi mosi kákala kwakuna. 24Masuwa mákala thama yi tseki, makaka makala manikani mawu, mukuma muphephi wákala kubanwanisa. 25Mu tangwa dya tatu dya mu suka, Yesu wisa kwena bawu, kakangala ha thandu ya yanga dya mbuta. a a v25 Kiphungu kya khya kya phipha kyákala tukidila kuna tangwa dya tatu tii yi tangwa dya sambanu dya mu suka — yawu thangwa yenina phipha yi kiozi kuluta, ku thwala kwa kukhya kwa kuma. 26Tangwa bámumona kakangala ha thandu ya yanga dya mbuta, balonguki báyuka bweya, bazimbula: «Kiphedikisa!» amana báyandika mu kukalunga ku bweya.
27Kaasi Yesu wábazonzisa muna mbala mosi: «Syenu kikesa! Meni yandu; lubangaku.»
28Phetelu wumuvutudini: «Pfumu, yuka ni ngeyi, wunsenda ni ngisa kwena ngeyi ha thandu ya mamba.»
29Wuzimbudi: «Wisa.» Phetelu wátuluka mu masuwa, wákangala ha thandu ya mamba amana wenda kwena Yesu.
30Kaasi buna kámona muphephi wa ngolu, wáyuka bweya, amana bwosu káyandika kuzyonda, wákalunga: «Pfumu, wundubula!»
31Muna mbala mosi, Yesu wáthuta koku dyandi, wámukwata, amana wuzimbudi: «Ngeyi mutu wa lukwikilu lwa khunda! Biki wuketyanisi?»
32Amana buna bákota mu masuwa, muphephi wátelama. 33Amana bana bákala mu masuwa báfukamina Yesu, bazimbula: «Kyedika, ngeyi wenina Mwana wa Tata wetu.»
34Buna bámanisa mu kusabuka, bátula ku Ngenezaleti. 35Buna batu ba fulu dina bámubakula, bátuma nsamu muna kinzunga kyosu kina amana bámunatina bambefu boosu. 36Bámulomba ni kabayambula kaka basimba kabeta ka muledi wandi, amana boosu bana basimba wawu bábeluka.
