Mikuku mya batu yi Ndinga ya Tata
Yesu wázimbula kwena Bafwadisi ni kikhaka kyawu kyázímbikisila ndinga ya Tata wetu meni, amana ni kima kisi sumuna mutu kisi lubuka mu mbundu, ka kina kisi kota mu munwa ku. Mukhetu mosi mwisi Kanana wámanga ni kakatulwa, wámuvutula, amana mwana wandi wa mukhetu wuna bákala muyangisa kwena kitembu wábeluka.
15 1Amana Bafwadisi yi balongi ba mitsiku bana bátuka ku Yelusalemi bakwísa kwena Yesu, bazimbudi: 2«Kikuma kya biki balonguki baku bisi losila mikuku mya bakhaka? Bisiku sukula moku ma bawu tangwa bisi dya.»
3Yandi wubavutwadini: «Kikuma kya biki benu phi lwisi losila mitsiku mya Tata wetu kikuma kya kikhaka kyenu? 4Mukuma Tata wetu kázimbula: “Zitisa tata waku yi ngudi waku,” amana: “Wuna wasínga tata wandi kondilo ngudi wandi, kyedika bamuhondisa.” 5Kaasi benu lwisi zimbula: “Wuna wazimbula kwena tata wandi kondilo ngudi wandi: ‘Kima kyosu kina walenda tambula kwena meni kyenina kabu dina dyátambikama kwena Tata wetu,’ 6kafwaniku zitisa tata wandi mu kima meni.” Bwabuna lwazímbikisila ndinga ya Tata wetu kikuma kya kikhaka kyenu. 7Benu bakavungalosi! Yesaya mboti kábikula kwena benu, buna kázimbula: 8“Kanda dyadi dyisi nzitisila mu malebu, kaasi mbundu ya dyawu kyana yenina yi meni; 9bisi pfukamina mu phamba, mu kulonga mitsiku mya batu hanga malongi.”»
10Amana Yesu wábokila mulumba-lumba wa batu kwena yandi, amana wazimbula: «Luyukenu amana lubakulenu: 11Ka kima ku kina kisi kota mu munwa kisi musumuna mutu, kaasi mana malubukini mu munwa, mawu kisi musumuna mutu.»
12Amana balonguki bandi bakwísa kwena yandi, bazimbudi: «Ngeyi wuzayi ni Bafwadisi bákala kisinza buna báyuka ndinga yayi?»
13Yandi wubavutwadini: «Kosu nti wuna Tata wama wenina mu mazilu kakúnaku, kavúsumuna. 14Luyambulenu bawu; bawu benina bathwadisi baphofu. Yuka ni phofu kasongila mukwawu phofu nzila, babodi babwa mu dibulu.»
15Phetelu wumuzimbwadini: «Tubangwamina kingana kyaki.»
16Yesu wazimbula: «Benu phi lwekina yi makokwa mu kubakula hanga bakwawu?» 17«Lwisiku bakula ni kima kyosu kina kisi kota mu munwa kisi kwenda mu kundu, kunima ku thwala kulubuka mu kabini? 18Kaasi kima kina kisi lubuka mu munwa, kyawu kisi tuka mu mbundu, amana kyawu kisi musumuna mutu. 19Mukuma muna mbundu ya mutu mwisi lubuka mabanza mambi: khengu, bizumba, kindumba kya kisaka-saka, bwifi, kimbangi kya luvunu, yi ngusi. 20Mamana mawu masi musumuna mutu, kaasi kudya yi moku makonda kusukula kukusumunaku mutu.»
Lukwikilu lwa kikwamina lwa mukhetu
21Kunima dya kukatuka ku fulu dina, Yesu wenda mu kinzunga kya Tidi yi Sitoni. 22Mukhetu mosi mwisi Kanana wuna wátuka mu kinzunga dina wakwísa, wákalunga: «Umphasa kyadi, A Pfumu, Mwana wa Tavidi! Mwana wama wa mukhetu wunyokunu ngolu kwena kitembu kya mbi.»
23Yandi kamúvutudilaku kima. Balonguki bandi bakwísa, bamuheka kikesa: «Mukula, mukuma wisi tudila bikalu ku manima metu.»
24Yandi wubavutwadini: «Yátumwa kaka kwena mikoku mina mizimbala mya nzu ya Isaleli.»
25Kaasi mukhetu wakwísa, wafukama ha mesu mandi, wázimbudi: «A Pfumu, unsadisa!»
26Yandi wubavutwadini: «Ka mboti ku mu kubonga madya ma bana amana kulosa kwena bambwa.»
27Mukhetu wázimbula: «Inga, A Pfumu, kaasi bambwa, bawu phi, bisi dya bizotu bina bwa mu tsi ya mesa ma bapfumu ba bawu.»
28Yesu wumuvutwadini: «A mukhetu, lukwikilu lwaku luneni. Bika bwahangama bwosu wuzodi.» Amana mwana wandi wa mukhetu wábeluka tuka mu tangwa dina.
Tata wabadisa batu mafunda maya
29Kunima dya kukatuka hana, Yesu wenda bela-bela yi yanga dya mbuta dya Ngadidi, watombuka mu mongu, amana wávwanda hana. 30Milumba-lumba mineni mya batu mikwísa kwena yandi mu bifwa malu, baphofu, bakwa bifu, mihunga, yi bakwawu balawu, bamusya ku malu mandi, amana wábabuka. 31Buna mulumba-lumba wa batu wáyituka, buna wamona mihunga mizonza, bakwa bifu bábeluka, bifwa malu bitinguna, yi baphofu bamona; bahana khembu kwena Tata wa Isaleli.
32Yesu wábokila balonguki bandi kwena yandi, amana wazimbula: «Kiwayi yenina kyawu kikuma kya mulumba-lumba wa batu wawu—tala bilumbu bitatu byekina bakala hakimosi yi meni, kaasi beku kima kya kudya. Nzodiku kubasula yi nzala, hanga keti balengalakana muna nzila.»
33Balonguki bamuhyula: «Kweti mu phungamu yayi twawana mapha ma kufwana ma kubadisila mulumba-lumba wa batu wawu?»
34Yesu wubahyudi: «Thalu ya mapha lwenina mawu?» Bawu bazimbula: «Tsambwadi, yi tuma twa batsema.»
35Buna wazimbula kwena mulumba-lumba wa batu ni bavwanda ha tsi. 36Amana wábonga mapha tsambwadi yi batsema, wávutula thandu, wábukununa, wáheka kwena balonguki, amana bawu báheka kwena milumba-lumba mya batu. 37Boosu bádya amana báyukuta. Bátonguna bitini bina byásala, mu bitunga tsambwadi bya kabasi. 38Batu bayakala bana bádya, bákala kitesu kya mafunda maya, konda kutanga bakhetu yi bana. 39Kunima dya kukula milumba-lumba mya batu, wákota mu masuwa, wenda mu kinzunga kya Mangadani.
