Bana basanda bakwísa kwena Mwana
Badimuka ba kinzenza báwana mwana amana bámufukamina; kyamvu ku Yelusalemi wávuna ni yandi phi kazodi kwisa fukamina, kunima wáhonda bana ba bayakala ba Betelemi. Tata wandi wámukeba mu ndosi yi mu kutina kwa builu ku Ngiphiti, heku ni mu kingolu. Kudila kwa Lasheli kwasala kwatelama hana kati dya tsangu.
Tata wetu kisi zonza mu vese 15
2 1Kunima dya kubutuka kwa Yesu ku Betelemi mu Yuteya, muna bilumbu bya kyamvu Helode, badimuka ba ku tsosu bátula ku Yelusalemi, 2amana bazimbula: «Kweti kenina kyamvu wa Bayuta wuna wábutuka? Mukuma twámona katumbwa kandi ku tsosu amana twisi kwisa mu kumufukamina.» 3Buna Helode kyamvu káyuka mambu mana, mbundu yandi yívwalangana, amana bisi Yelusalemi boosu ni yandi. 4Wákutakanisa bambuta ba banganga Nzambi boosu yi balongi ba mitsiku ba batu, amana wáhyula kweti Kidisitu kafwani kubutuka. 5Bámuvutwala: «Ku Betelemi mu Yuteya, mukuma bwabu básonika mu nzila ya mbikudi: 6“Kaasi ngeyi, Betelemi, mu tsi ya Yuta, mu kyedika kweku wa phamba hana kati dya bapfumu ba Yuta; mukuma mu ngeyi pfumu mosi kalúbuka, wuna kakála kalema wa Kiseledi, batu bama.”»
7Hanga Helode wátedisa badimuka mu kitsweki amana wázaya kwena bawu tangwa kyedika dina katumbwa kámonika. 8Wábatuma ku Betelemi, amana wuzimbudi: «Yendenu, sandenu mwana bukheti-bukheti. Buna lwamúmona, vutukenu amana samunenu kwena meni, hanga meni phi yenda yimufukamina.»
9Kunima dya kuyuka kyamvu, bawu bakatuka; katumbwa dina bámona ku tsosu kátekila ku thwala ya bawu, yi kuna kátelama ha tandu ya homa hana kákala mwana. 10Buna bámona katumbwa, básangwala yi kyesi kya lawu. 11Buna bákota mu nzu, bámona mwana ni Madiya ngudi wandi, bábwa amana bamúfukamina. Bázibula kimvwama kya bawu amana bámuheka makabu: wolu, malasi, yi mila. 12Bákebwa mu ndosi ni bavutukaku kwena Helode, bavutuki ku tsi ya bawu mu nzila yahika.
Tata wasweki Mwana wandi
13Kunima dya kukatuka kwa bawu, wanzyo wa Tata wetu wumulubwakidi Yozefu mu ndosi: «Telama, bonga mwana yi ngudi wandi, tina ku Ngiphiti, amana wanangina kwakuna yi kuna yikusamunina—Helode kena bela-bela mu kusanda mwana ndangu kamuhondisa.»
14Amana wátelama, wábonga mwana yi ngudi wandi muna phipha amana wákatuka mu kwenda ku Ngiphiti,
15amana wánanga kwakuna yi kuna káfwila Helode, ndangu malungila mana kázimbula Tata wetu mu nzila ya mbikudi: «Mu Ngiphiti yátela Mwana wama.» a a v15 Mateyo wusadila mambu mana ma Hoseya kwena Yesu: Mwana wa kyedika wuna wisi lungisa mana Kiseledi, wuna watéluka mu Ngiphiti, kafwana lungisaku.
16Hanga Helode, buna kámona ni badimuka bámuvuna, wáfunga khabu lawu amana wátuma batu ni bahonda bana boosu ba bayakala ba mvula modi yi kuna banda mu Betelemi yi binzunga byandi byosu, bwosu tangwa dina kázaya kwena badimuka. 17Bwabuna malungidi mambu mana kázonza mbikudi Yelemiya: 18«Ndinga yáyukama ku Lama, bidilu yi khondu ya ngolu, Lasheli wisi dila bana bandi; wábusila kutambula kikesa, mukuma bakalaku kedi.»
Tata wutedi Mwana wandi kuvutuka
19Kaasi buna káfwila Helode, wanzyo wa Tata wetu wumulubwakidi mu ndosi kwena Yozefu ku Ngiphiti, 20amana wuzimbudi: «Telama, bonga mwana yi ngudi wandi, yenda ku tsi ya Kiseledi, mukuma bana basanda luzingu lwa mwana bafwidi.»
21Buna wátelama, wábonga mwana yi ngudi wandi, amana wénda ku tsi ya Kiseledi. 22Buna káyuka ni Alakelawo kakala yadila Yuteya mu homa ha tata wandi Helode, bweya bubakwati mu kwenda kwakuna. Bákebwa mu ndosi, wáyombuka ku kinzunga kya Ngadidi. 23Wénda amana wázinga mu mbanza yimosi yina bisi tela Nazaleti, ndangu malungila mambu ma bambikudi: «Bakámutela mwisi Nazaleti.»
