Koku dya Tata Dituma Nehemiya
Zizi dya Nehemiya dya kyadi dyámonwa kwena kyamvu, amana ni koku kwa mboti kwa Tata wandi ha thandu yandi, wálomba kwena kyamvu miti mya kutungila yi nzila ya talala hanga katungulula mbanza ya batata bandi yina yazangana. Wázieta mu Yelusalemi yakuzangana yandi mosi mu phipha ku thwala kazimbula kwena mutu, amana wákutika batungi bwosu Sambalati yi Tobiya bakala singa.
2 1Muna ngonda ya Nisani, muna mvula ya makumodi ya luyalu lwa kyamvu Atasekisesi, vinu dyákala ku thwala yandi; yábonga dyawu amana yáhana dyawu kwena kyamvu. Tuka khaku, yikalaku ni kyadi ku thwala yandi. a a v1 Nisani yákala ngonda yatheti ya mvula ya Bahebelu, yina yibwilanga ha luyandiku lwa tsungi ya kyanzu (bela-bela yi ngonda ya Malasi yi Aphilili). 2Kyamvu wuhyudi: «Kikuma kyaki zizi dyaku dyenina yi kyadi, kaasi wubelaku? Dyenina kaka kyadi kya mbundu.» Buna bweya bwa lawu bwánkwata.
3Yázimbula kwena kyamvu: «Kyamvu kazínga mu mvula yi mvula! Kikuma kyaki zizi dyama dilendaku kukala konda kyadi, buna mbanza, homa ha mazyamu ma batata bama, dyenina mu kuzangana, amana mielu mya dyawu misi yoka ni mbawu?»
4Kyamvu wuhyudi: «Biki wubati lomba?» Buna yálombila kwena Tata wetu wenina mu mazilu, 5amana yázimbula kwena kyamvu: «Yuka ni dyisephidisa kyamvu, amana yuka ni musadi waku mweni khenda ku mesu maku, wunthuma ku Yuta, ku mbanza ya mazyamu ma batata bama, hanga yítungulula yawu.»
6Kyamvu, yi pfumu wa mukhetu wuna wazakala bela-bela yandi, wuhyudi: «Kitambu kyaku kyálunga bilumbu bikwa? Amana tangwa yi khi wukavútuka?» Dyásephidisa kyamvu mu kunthuma, buna yáhana yandi tangwa.
7Yázimbula hika kwena kyamvu: «Yuka ni dyisephidisa kyamvu, wunhana mikanda kwena bapfumu ba kinzunga kya ku Ndambu yankaka ya Nzadi, hanga bansisa yihita nate yitula ku Yuta. 8Amana mukanda wumosi kwena Asafi, tsinzidi wa musitu wa kyamvu, hanga kanhana miti mya kutungila mielu mya nzu ya ngolu yina yena bela-bela yi nzu ya Nzambi, yi kibaka kya mbanza, yi nzu yina yikazínga.» Kyamvu wásadila bilomba byama, mukuma koku dyambote dya Tata wama dyákala ha thandu yama.
9Yákwenda kwena bapfumu ba kinzunga kya ku Ndambu yankaka ya Nzadi amana yáhana bawu mikanda mya kyamvu. Kyamvu wáthuma phi bapfumu ba baphumbulu yi bakwa baphunda hakimosi yi meni. 10Buna Sanibalati mwisi Holoni yi Tobiya musadi mwisi Amoni báyuka bwabuna, mambu mábabela mbi lawu, mukuma mutu mosi wakwísa mu kusanda mamboti ma bana ba Kiseledi.
Kudyatila Bibaka Byabwa mu Phipha
11Buna yátula ku Yelusalemi amana yanánga kwakuna bilumbu bitatu. 12Yábwa mu phipha hakimosi yi batu bakhunda. Ka mutu ku yázimbula mana Tata wama kátula mu mbundu yama mu kusadila Yelusalemi. Mbisi yimosi yikalaku yi meni, kaasi kaka yina yázakala ha thandu yayi. 13Mu phipha, yálubuka mu mwelu wa Beti, yákwenda ku Kiziba kya Mbwa za Nseki, nate ku mwelu wa Tuvi, mu kutala bibaka bya Yelusalemi bina byabwa yi mielu mya dyawu mina myáyokama. 14Yáhita nate ku mwelu wa Thima yi ku Kiziba kya Kyamvu, kaasi mwákalaku homa hanga mbisi yina yázakala ha thandu yayi yihita. 15Mu phipha, yákwenda ha zulu dya beti, mu kutala kibaka; hanga yávutuka, yákota mu mwelu wa Beti amana yávutuka ku nzu. 16Basadi bázayaku homa yákwenda, holo mana yákala sala; mukuma ku Bayuta, ku banganga Nzambi, ku batu ba luzitu, ku basadi, yi ku bankaka bana basadidi kisalu, yátekilaku kuzimbula. 17Buna yázimbula: «Lwisi mona mpasi zetu: Yelusalemi yena mu kuzangana, mielu mya yawu misi yoka. Lwizenu, tutungulula kibaka kya Yelusalemi hanga tukondi kala tsoni dyaka.» 18Yábazimbula buna koku dyambote dya Tata wama dyákala ha thandu yama, yi mana kyamvu kázimbula. Bawu bávutula: «Tuvumbukenu, tutunga.» Buna básyamisa moku ma bawu mu kisalu kyambote.
19Buna Sanibalati mwisi Holoni, Tobiya musadi mwisi Amoni, yi Ngesemi mwisi Alabiya báyuka bwabuna, bátusekila amana bátulewula, bazimbula: «Kyaki kima kyaki lwisi sala? Lwisi kolama ku kyamvu?»
20Yávutula: «Tata wetu wenina mu mazilu katuheka lununga. Betu basadi bandi, tukayandika kutungulula, kaasi benu lwena yi kabu ku, holo muswa, holo khumbu, mu mbanza ya Yelusalemi.»
