Nzila yina bádyatila
Moyize wásonika kosu kifulu kya nzila tuka ku Lamesesi tii yi bilanga bya Mowabi, kifulu ku kifulu, hakimosi yi kuna Loni káfwila. Buna mutsiku: sabukenu Yolutani, kulenu bana bazinga mu tsi, bwisenu bifwanisu byawu yi bifulu byawu bya zulu, amana kabenu tsi mu kubula ndambu.
Tata wetu kisi zonza mu mavese 51–56
33 1Mamana mana ni bifulu bina bánanga bana ba Kiseledi mu nzila ya bawu bwosu bálubuka mu Ngiphiti, mu bimvuka bya bawu, mu koku kwa Moyize yi Loni. 2Moyize wásonika bifulu bina bákatuka mu nzila za bawu, bwosu káhana nzila Tata wetu; amana mamana mana ni nzila za bawu mu bifulu bina bákatuka. 3Bákatuka ku Lamesesi mu kilumbu kya kumi yi tanu kya ngonda ya theti, kilumbu kina kyálanda Phaki. Bana ba Kiseledi bálubuka yi kikesa, ku mesu ma bisi Ngiphiti boosu, 4muna tangwa dina, bisi Ngiphiti bakala zika bana ba bawu ba batsomi boosu, bana Tata wetu káhonda hakati dya bawu; amana Tata wetu wázenga mikanu ha thandu ya banzambi ba bawu. 5Bana ba Kiseledi bákatuka ku Lamesesi amana bánanga ku Sukoti. 6Bákatuka ku Sukoti amana bánanga ku Etami, kina kyenina ha kabeta ka tseki. 7Bákatuka ku Etami, bávutuka ku Phi-Hahiloti, ku malubwakidi ma Baala-Zefoni, amana bánanga ku thwala ya Migidoli. 8Bákatuka ku thwala ya Hahiloti, básabuka yanga, bákota mu tseki, amana bázyeta bilumbu bitatu mu tseki ya Etami, buna bánanga ku Mala. 9Bákatuka ku Mala amana bátula ku Elimi, kuna kwákala yi mabulu ma mamba kumi yi modi yi miti mya mbati makumi tsambwadi; mwamuna bánanga. 10Bákatuka ku Elimi amana bánanga bela-bela yi Yami-Sufi. a a v10 Yami-Sufi ni khumbu ya Kiebeleo ya mamba mana batu boosu bisi tela ni yanga dya mbuta dya Kabengi. 11Bákatuka ku Yami-Sufi amana bánanga mu tseki ya Sini. 12Bákatuka mu tseki ya Sini amana bánanga ku Dofika. 13Bákatuka ku Dofika amana bánanga ku Alusi. 14Bákatuka ku Alusi amana bánanga ku Lefidimi, kuna batu bakalaku yi mamba ma kunwa. 15Bákatuka ku Lefidimi amana bánanga mu tseki ya Sinayi. 16Bákatuka mu tseki ya Sinayi amana bánanga ku Kibiloti-Hatava. 17Bákatuka ku Kibiloti-Hatava amana bánanga ku Hazeloti. 18Bákatuka ku Hazeloti amana bánanga ku Litima. 19Bákatuka ku Litima amana bánanga ku Limoni-Pelesi. 20Bákatuka ku Limoni-Pelesi amana bánanga ku Libina. 21Bákatuka ku Libina amana bánanga ku Lisa. 22Bákatuka ku Lisa amana bánanga ku Kehelata. 23Bákatuka ku Kehelata amana bánanga ku mongu wa Shefeli. 24Bákatuka ku mongu wa Shefeli amana bánanga ku Halada. 25Bákatuka ku Halada amana bánanga ku Makheloti. 26Bákatuka ku Makheloti amana bánanga ku Tahati. 27Bákatuka ku Tahati amana bánanga ku Tela. 28Bákatuka ku Tela amana bánanga ku Mitika. 29Bákatuka ku Mitika amana bánanga ku Hasimona. 30Bákatuka ku Hasimona amana bánanga ku Moseloti. 31Bákatuka ku Moseloti amana bánanga ku Bene-Yakani. 32Bákatuka ku Bene-Yakani amana bánanga ku Holi-Hagidigadi. 33Bákatuka ku Holi-Hagidigadi amana bánanga ku Yotibata. 34Bákatuka ku Yotibata amana bánanga ku Abilona. 35Bákatuka ku Abilona amana bánanga ku Ezioni-Gebeli. 36Bákatuka ku Ezioni-Gebeli amana bánanga mu tseki ya Tsini, disongidila ni Kadesi. 37Bákatuka ku Kadesi amana bánanga ku mongu wa Holi, ha kabeta ka tsi ya Edomi. 38Loni, nganga Nzambi, wázanza ku mongu wa Holi bwosu káhana nzila Tata wetu, amana wáfwa mwamuna, mu mvula ya makumaya kunima dya bana ba Kiseledi kukatuka mu tsi ya Ngiphiti, mu ngonda ya tanu, mu kilumbu kyandi kya theti. 39Loni kákala yi mvula khama mosi yi makumodi yi tatu tangwa káfwila ha mongu wa Holi. 40Kyamvu wa Aladi, mwisi Kanana, wuna wákala zinga ku Negebi ya Kanana, wáyuka ni bana ba Kiseledi bakala kwisa. 41Bákatuka ku mongu Holi amana básema ku Zalimona. 42Bákatuka ku Zalimona amana básema ku Punoni. 43Bákatuka ku Punoni amana básema ku Oboti. 44Bákatuka ku Oboti amana básema ku Iye-abalimi, kuna ndilu ya Mowabi. 45Bákatuka ku Iyimi amana básema ku Diboni-ngadi. 46Bákatuka ku Diboni-ngadi amana básema ku Alimoni-dibilataimi. 47Bákatuka ku Alimoni-dibilataimi amana básema muna myongu mya Abalimi, bela-bela yi Nebo. 48Bákatuka muna myongu mya Abalimi amana básema muna ndanda za Mowabi, kuna nzadi Yolutani ya Yediko. 49Básema kuna nzadi Yolutani, tuka ku Beti-yesimoti tii yi kuna Abeli-sitimi, muna ndanda za Mowabi.
50Tata wetu wázimbula kwena Moyize muna ndanda za Mowabi, kuna nzadi Yolutani ya Yediko, mu kuzonza:
51«Zimbula kwena bisi Kiseledi amana ubazimbwala: Muna tangwa lwasabuka nzadi Yolutani mu kukota mu tsi ya Kanana. 52Lukulenu batu boosu bana bisi zinga mu tsi ku thwala ya benu; lubukisenu bifwanisu byosu bya bawu bya kutula yi biteki bya tsengo, amana luwulumunenu bifulu byosu bya bawu bya ha thandu. 53Luvwenu tsi amana luzingenu muna yawu, mukuma yiluhekini tsi yina hanga luvwa yawu. 54Lukabanenu tsi mu zeki hakati dya makanda ma benu—tsi ya lawu kwena kanda dya mbuta, ndambu yafyoti kwena kanda dya fyoti. Kwosu kuma zeki dyábwila kwena mutu, kina kyakala kya yandi. Lwakála vwa tsi mu kulandaka bikanda bya bakhaka benu.
55«Kaasi yuka ni ka lukula batu bana bisi zinga mu tsi ku thwala ya benu ku, bana lwasisa bakála hanga minsonga mu mesu ma benu yi tsaku mu luseki lwenu, bisi luyangisa mu tsi yina lwazínga. 56Amana yikála hanga kwena benu mana yayukani kuhanga kwena bawu.»