Tuka mu Fusyangeni Tii ku Mesa ma Bapfumu
Kiyuvu kyenina bu Tata wetu, wuna kazakadini muna bisoka, kalenda tala tii ku tsi. Mvutu yenina mana kisi hanga tangwa kisi dikulumuna: wisi tombula phutu tuka mu dumbu dya mufututu mu kuzakadisa hakimosi yi bapfumu, amana wisi heka mukhetu wuna konda mwana nzu yina yizadidi ni bana.
113 1Aleluya! Muzatulenu, benu basadi ba Tata wetu; kumisenu khumbu ya Tata wetu. 2Lukumu kwena khumbu ya Tata wetu, tuka buthwena tii yi mvula yi mvula. 3Tuka mu kulubula kwa tangwa tii mu kudyama kwandi, bafweti kumisa khumbu ya Tata wetu. 4Tata wetu watombuka kuhita makanda moosu, khembu yandi yenina kuhita mazilu. 5Nani wenina hanga Tata wetu, wuna kazakadini muna bisoka, 6wuna wisi dikulumuna mu kutala mazilu yi tsi? 7Yandi wisi tombula phutu tuka mu fusyangeni amana wisi tombula wuna wenina mu phasi tuka mu dumbu dya mufututu, 8mu kubazakadisa hakimosi yi bapfumu, hakimosi yi bapfumu ba batu bandi. 9Yandi wisi zakadisa mukhetu wuna konda mwana mu nzu yandi hanga ngudi wa bana wuna wenina yi kyesi. Aleluya!
