Kumenga kwa Zoba
Kwena pfumu wa misindikila. Nkunga wa Tavidi.
Mambu ma zoba ma kuzonza ni kweku Nzambi menina ma mihangu, ka ma mabanza ku. Tata wetu wisi sanda batu boosu mu kumona wuna wisi bakula amana kamónaku keti mosi. Bana bisi dya batu bandi babwila bweya bwa kithulumukina; mukunga wisi suka mu kusukidila luhulusu lwisi tuka ku Siyoni.
14 1Zoba wisi zonza muna mbundu yandi: «Kweku Nzambi.» Baditotisini, mihangu mya bawu myenina mya mbi; kweku mutu wisi hanga buweti.
2Tata wetu wisi tala tuka ku mazilu kwena bana ba batu, mu kumona yuka ni bakenina bana bisi bakula, bana bisi musanda. 3Boosu bayekukini; hakimosi baditotisini; kweku mutu wisi hanga buweti, keti mosi loni.
4Bazayiku keti kima, batu boosu baba ba mihangu mya mbi, bana bisi vukula batu bama bwosu bisi dya dipha, amana bisi tela Tata wetu ku? 5Kuna bawu, bweya bwa lawu bwábabwila, mukuma Tata wetu kenina hakimosi yi mbandu ya batu ba masonga. 6Benu batu ba mihangu mya mbi, lwazóla zimbisa mabanza ma mutsukami, kaasi Tata wetu kenina kiswaminu kyandi.
7A! Ndangu luhulusu lwa Kiseledi lwátuka ku Siyoni! Muna tangwa Tata wetu kavutula kimvwama kya batu bandi, Yakobi kasángwala, Kiseledi kakala yi kyesi!
