Bihangwa Byosu, Muzatulenu Yandi
Kutela matondu tuka ku zulu tii ha tsi: banzyo, tangwa yi ngondi, buna bihangwa bya mu yanga, pfunzi, mongu, miti, bambisi, bakyamvu yi bana. Byosu bina byátelwa, wáta kaka amana byáhangama; amana byosu bisi lombwa byavutula yi khumbu yimosi: Tata wetu.
148 1Aleluya! Muzatulenu Tata wetu tuka ku mazilu; muzatulenu yandi muna bisoka. 2Muzatulenu yandi, benu banzyo bandi boosu; muzatulenu yandi, benu basuta bandi boosu. 3Muzatulenu yandi, tangwa yi ngondi; muzatulenu yandi, benu bathetimbwa boosu bana bisi kenzula. 4Muzatulenu yandi, benu mazilu ma bisoka, yi benu mamba mana menina ha zulu dya mazilu. 5Bazatula khumbu ya Tata wetu, mukuma yandi wáta amana byáhangama. 6Wábatunga byawu mvula yi mvula; wáheka mutsiku wuna wulendaku tota.
7Muzatulenu Tata wetu tuka ha tsi, benu bihangwa bya mu yanga dya mbuta yi benu madingu moosu ma yanga dya mbuta, 8mbawu yi mvula ya matadi, mvula ya phembi yi mbuki, pfunzi ya ngolu yina yisi lungisa ndinga yandi, 9mongu yi mina myosu mya khunda, miti mina misi buta bibundu yi miti myosu mya sedeli, 10bambisi ba mu musitu yi bibulu byosu, bihangwa bina bisi landanda yi banuni ba ku zilu, 11bakyamvu ba tsi yi batu boosu, bathotila yi bathwadisi boosu ba tsi, 12bangunza yi bandumba phila mosi, binunu yi bana.
13Bazatula khumbu ya Tata wetu, mukuma khumbu yandi yimosi yina yitombulama; khembu yandi yenina ha zulu dya tsi yi zilu. 14Wátombula ngolu kikuma kya batu bandi, khembu kikuma kya batu bandi boosu bakwikama, kikuma kya batu ba Kiseledi bana benina bela-bela yi yandi. Aleluya!
