Khi bwambote mu kuyimbila khembu
Tata wetu wisi tanga bathetimbwa amana wisi tela kosu mu khumbu yandi, amana wisi belula bana benina yi mbundu zábwa; wisi fidinga mvula ya phembi yi mbuki, amana ndinga yandi yina yisi byawu kitula mamba. Kyesi kyandi kisiku mu ngolu za kavalu keti mu ngolu za mutu, kaasi mu batu bana bisi sya kivuvu mu khenda yandi.
147 1Aleluya! Khi bwambote mu kuyimbila khembu kwena Tata wetu; khi bwa kyesi yi bwáfwana mu kumukembisa.
2Tata wetu wisi tunga Yelusalemi; wisi kutikisa batu ba Kiseledi bana bámwangana. 3Wisi belula bana benina yi mbundu zábwa amana wisi kasa phuta za bawu. 4Wisi tanga bathetimbwa; wisi tela kosu mu khumbu yandi. 5Tata wetu Pfumu kenina mbuta, amana mukwa ngolu zoosu; ngangu zandi zilutini kitesu. 6Tata wetu wisi tombula batu badikulumuna; wisi lemba batu ba mbi ha tsi.
7Yimbilenu kwena Tata wetu muna kuvutula matondu; sikilenu kwena yandi mu nzenze. 8Wisi fidinga mazilu mu matuti; wisi nokisa mvula ha tsi; wisi menisa mwangu muna mongu. 9Wisi hana bambisi madya ma bawu, yi bana ba bangandwanganga tangwa bisi kalunga. 10Tsambu yandi yisiku mu ngolu za kavalu, amana kyesi kyandi kisiku mu malu ma mutu. 11Mbundu ya Tata wetu yisi mona tsambu mwena bana bisi kumona boma, mwena bana bisi sya kivuvu mu khenda yandi.
12Kembisa Tata wetu, Yelusalemi! Kembisa Tata waku, Siyoni! 13Mukuma wisi kodisa misinga mya mwelu waku; wisi sakumuna bana baku mu kati dya bibaka byaku. 14Wisi tula ngemba mu mafula ma tsi yaku; wisi kuzadisa mu bule dyambote dya lutini. 15Wisi fidisa lutumu lwandi ha tsi; ndinga yandi yisi lenga nsualu. 16Wisi hana mvula ya phembi hanga muhandi; wisi mwanga disula hanga mbombi. 17Wisi losa matadi mandi ma mvula hanga bizotu; nani wulenda telama ku thwala ya kyosi kyandi? 18Wisi fidisa ndinga yandi amana wisi yakisa matadi ma mamba; wisi heka pfunzi yandi, amana mamba matíka. 19Wisi zimbula ndinga yandi kwena Yakobi, mitsiku myandi yi pfundusu zandi kwena Kiseledi. 20Kasadilaku bwabu kwena kanda dyankaka dyosu; bázayaku pfundusu zandi. Aleluya!
