Aleluya
Lusyaku kivuvu kyenu mwena bapfumu, bana mabanza mawu masi ziluka muna kilumbu kimosi kina basi fwa. Kima kikwawu yenina Tata wetu, wuzayikiswa mu mana kasala kyedika: mukanu kwena bana bisi nyokuna, dipha kwena bana bisi yuka nzala, balubulwa ba boloku, banzenza, nsona yi bafwidi bakebwa.
146 1Aleluya! Zatula Tata wetu, moya wama.
2Yizátula Tata wetu bwosu yenina mu luzingu; yiyímbila kwena Tata wetu bwosu yenina yi moya.
3Lusyaku kivuvu kyenu mwena bapfumu, mu mutu wuna wisi fwa, wuna kafwaniku kuluhulula. 4Moya wandi wisi katuka, yandi wisi vutuka ku mafu; muna kilumbu kina mabanza mandi máziluka. 5Kyesi kwena mutu wuna Nzambi wa Yakobi kenina lusadisu lwandi, wuna kivuvu kyandi kyenina mwena Tata wetu.
6Yandi wuna wásema zilu yi tsi, yanga dya mbuta yi bima byosu bina byenina mukati; yandi wisi lunda kwikama mvula yi mvula. 7Yandi wisi zengila mukanu kwena batu babana bisi nyokuna; wisi heka dipha kwena batu babana bisi yuka nzala. Tata wetu wisi lubula batu ba boloku. 8Tata wetu wisi temuna mesu ma baphofu; Tata wetu wisi tombula bana benina yi bizitu; Tata wetu wisi zola batu ba masonga. 9Tata wetu wisi keba banzenza; wisi simba nsona yi mufwidi, kaasi nzila ya batu ba mbi, yandi wisi yibivisa.
10Tata wetu kayadiki mvula yi mvula—Tata waku, A Siyoni, muna makula moosu. Aleluya!
