ሃሌ ሉያ
ተስፋችሁን በመኳንንት ላይ አታድርጉ፤ ዕቅዳቸው በሞቱበት ቀን አብሯቸው ይጠፋልና። አማራጩ አብ ነው፤ በእውነት በሚያደርገውም ይዘረዘራል፦ ለተጨቆኑት ፍትሕ፣ ለተራቡት እንጀራ፣ ለታሰሩት መፈታት፣ ለመጻተኞች፣ ለድሀ አደጎችና ለመበለቶች ጥበቃ።
146 1ሃሌ ሉያ! ነፍሴ ሆይ፣ አባታችንን አመስግኚ።
2በሕይወት ዘመኔ ሁሉ አባታችንን አመሰግናለሁ፤ እስትንፋስ እስካለኝ ድረስ ለአባታችን እዘምራለሁ።
3ሊያድናችሁ በማይችል በሟች ሰው፣ በመሳፍንትም አትታመኑ። 4መንፈሱ ይወጣል፣ ወደ መሬትም ይመለሳል፤ በዚያው ዕለት ዕቅዶቹ ይጠፋሉ። 5ረዳቱ የያዕቆብ አምላክ የሆነለት፣ ተስፋውም በአባታችን ያለ ሰው ብፁዕ ነው።
6ሰማይንና ምድርን፣ ባሕርንም በውስጣቸው ያለውን ሁሉ የፈጠረ እርሱ ነው፤ ለዘላለምም ታማኝነቱን ይጠብቃል። 7ለተጨቈኑ ፍትሕን ያመጣል፤ ለተራቡም እንጀራ ይሰጣል። አባታችን እስረኞችን ነጻ ያወጣል። 8አባታችን የዕውራንን ዐይን ይከፍታል፤ አባታችን የተጐሳቈሉትን ከፍ ከፍ ያደርጋል፤ አባታችን ጻድቃንን ይወድዳል። 9አባታችን መጻተኞችን ይጠብቃል፤ ድኻ አደጉንና መበለቲቱን ይደግፋል፤ የክፉዎችን መንገድ ግን ያጠፋል።
10አባታችን ለዘላለም ይነግሣል፤ ጽዮን ሆይ፣ አባትሽ ለልጅ ልጅ ሁሉ ይነግሣል። ሃሌ ሉያ!
