Lombilu lwa Mutu Wakonda Sala Mbi
Lombilu lwa Tavidi.
Tavidi wisi lomba kayukwa bwosu mutu wakonda bukamvi, mbundu yandi yanyubukwa mu phipha yi malu mandi makonda kudibunda. Mu kuyatwa ni khosi yina yisi fukama, wisi lomba kakebwa hanga mboni ya disu, amana wisi tala ku thwala ya bambeni bandi mu kumona luse lwa Tata wandi.
17 1Yuka kikuma kya masonga, A Tata wama; banzila kindanda kyama; yuka lombilu lwama luna lwisi tuka muna malebu makonda bukamvi. 2Masonga mama makwisa mu thwala yaku; mesu maku mamona mana menina ma masonga.
3Wásanda mbundu yama, wányubukisa mu phipha, wámeka meni amana wámona keti kima; yíbonga lukanu ni munwa wama wusumukaku. 4Mu mambu ma mihangu mya batu, muna ndinga ya malebu maku yídikebila mu nzila za bakwa kingolu-ngolu. 5Bitambi byama byádikwamina mu nzila zaku; malu mama mádibundaku.
6Yikúbokila ngeyi, mukuma kavútula meni, A Tata wama; yuka meni; wa mambu mama. 7Songila kuyituka kwa khenda yaku ya bulunda, ngeyi wuna wisi hulula ni koku kwaku kwa lubakala bana bisi swamina mwena ngeyi mu bambeni ba bawu. 8Kheba meni hanga mboni ya disu dyaku; sweka meni mu kininga kya mahela maku, 9mu batu ba mbi bana bisi mbalukila, bambeni bama ba lufwa bana bisi nzinga.
10Bázibika mbundu za bawu zazitama; munwa mya bawu misi zonza mu lulendu. 11Bátusanda amana buabu bisi tuzinga, bisi sya mesu ma bawu ndangu batulosa ha tsi. 12Yandi kenina hanga thambu wuna wenina yi nzala ya kuyata nyama yandi, hanga mwana thambu wuna wenina wafukama mu kifwandu.
13Telama, A Tata wama! Nwanisa yandi, bwisa yandi ha tsi! Phulula moya wama mu batu ba mbi ni mbedi yaku ya phoku, 14ni koku kwaku, A Tata wama, mu batu ba mutindu wawuna, mu batu ba tsi yayi bana lufutu lwa bawu lwenina mu luzingu lwa tsi yayi. Ngeyi wisi basisa kundu dya bawu ni bima wábalumbikila; bana ba bawu bavwa bima bya lawu, amana basisila bana ba bawu ba fyoti bima bina byásala.
15Kaasi meni, yikamona mbunzu yaku mu masonga; tangwa yikatokama, yikayukuta mu kumona kifwani kyaku.
