Mesakemo thüma kecho
David kechozo.
Davidoe kümatho lü celü kejo kemo thüma bi reni süte zisü chota, pü melü bavüdo phukesü mu pü phe reyho mota. Losha mhüjü taki thümae pü hu ketala, pü mhü nuo bi khi süte zisü po, mu pü ngomumiko lano ketso de pü Po nzü ngoyi süo ngoyi.
17 1Apo, kümatho mesa reniyite; a sekesü khimenu tate; kejo kemo a mülü celü a kecho medo züte. 2A kemezi no presa celü vorite; no mhü kemezi süo ngoyite.
3No a melü phuta, no tüzühzho a ketsoti, no a dojü thita vele nothi ngoyi mota; a meyi phoma mote zisü I reso. 4Thüma mhatho lü, no mülü dzüo lü, murimu thüma cho lü I vomo kütala. 5A phecho no sho lü chotsükeyita; a phe reyho mota.
6I no ce cüyo, kekrelamori no a fülayito, Apo; a ce medo züte; a po reniyite. 7No khi kemezi lü, uko ngomu celü no lü rezhüyi leo thümako küla, no jütsüjükho kekhrü mha khrüti seyite. 8No mhü nuo bi a khiyite; no thenopü keso lü a resüta te, 9A metsü kesuko celü, a boyi leo kesamo a ngomuko celü.
10Uko u melü rüdü khayita; uko meyi kümüha poyo. 11Uko ha phuvo die ngutü ha boyita; uko u mhü whuzüde, ha cejü lü süva lü bazo. 12Pü losha, pü co tüti toli müri ketao bi, losha nuo kezhomi lü ba keyo bi zo.
13Apo, tasüte! Pü mhüjülü thayi die, pü kra süte! No zecho lü, kesuko celü a kehü süphra te, 14No khi lü, Apo, hibi thümako celü, tsüdo cejülü thümako celü, uko zhokhro hio kehü lü bao. No kengu ketao süo lü u püva chu sü; u nuneko mha prü sa ngoyo, uko u shu u nunuko ce tehebayo.
15I lü, kümatho lü no zü ngoyito; I rhüla sü lize, no rhilü ngoyi die I megu süto.
