Wunfundisa mu Masonga, A Tata
Nkunga wa Tavidi.
Tavidi wisi lomba ni kazyaminwa, mbundu yandi yi ngangu zandi zitalwa amana zisukulwa, mukuma yandi wákatuka kwena batu ba bukamvi yi kwena moku mazadi makabu ma luvunu. Mana kasi zola kaku mpheka ya nkanu kaka, kaasi fulu: nzu yina khembu ya Tata wandi yisi vunda.
26 1Wunfundisa mu masonga, A Tata, mukuma yádyatila mu kasemi kyama, amana mu Tata wama yásya mbundu konda kuzayazaya.
2Wuntala, A Tata, amana wunzyamina; wusukula mbundu yama yi ngangu zama. 3Mukuma khenda yaku ya bulunda yenina ku thwala ya mesu mama, amana yisi zinga mu kwikama dyaku.
4Yisiku zakala yi batu ba bukamvi, keti kukala ha kimosi yi bakavungalosi. 5Yisi menga kibuka kya basadi ba mambu ma mbi, amana yisiku zakala yi batu ba mbi. 6Yisi sukula moku mama mu kukonda kikalu, amana yisi kangala mesa maku ma kimenga, A Tata, 7mu kusamuna matondu mama mu mbembu ya ngolu, amana kuta mihangu myaku myosu mya kuyituka.
8A Tata, yisi zola nzu yina ngeyi wisi zingila, kuma kuna khembu yaku yisi vunda.
9Wukombulaku moya wama hakimosi yi basumuki, keti luzingu lwama yi bakwa kingolu-ngolu, 10bana muna moku mawu mwena bimeka bya mbi, amana moku mawu ma lubakala mabasa makabu ma luvunu. 11Kaasi meni, yisi dyatila mu kasemi kyama; wunlubula amana ngyukila khenda.
12Yisi telama ha musenzi; muna kibuka kineni, yikásakumuna Tata wama.
