Kyeziya kyama, Ngolu zama
Mukunga wa Tavidi.
Tavidi wenina mu kiwayi kya kyedika — basuta, bambangi ba mbi, amana bweya ni bibuti byandi meni bilenda kumusisa. Mvutu yandi kaku ni kiwayi kyenina kyakhunda, kaasi ni Tata wandi wenina bela-bela kuluta kyawu. Yandi wisi lomba dyambu dimosi: ni kazingila ku thwala ya Tata wandi.
27 1Tata wama kenina mwini wama yi luhulusu lwama—nani yibánga? Tata wama kenina ngolu za luzingu lwama—kwena nani yiyúka bweya?
2Muna tangwa batu ba mambi babwesuki kwena meni mu kuvukula misuni myama— bandwandwa bama yi bambeni bama—bawu beka bana bisi bwila kisinza amana bwa. 3Ho ni dibuka dya basuta dyatunga mbanza mu kunwanisa meni, mbundu yama yiyúkaku bweya; ho ni mvita yatelama mu kunwanisa meni, buna phi yikála yi kikumbwala.
4Dyambu dimosi yilómba kwena Tata wama, dyadi dina yisi sanda: ni yazingila mu nzu yandi bilumbu byosu bya luzingu lwama, mu kutala phisi yandi amana mu kumusanda mu nzu yandi. 5Mukuma kanswéka mu buyambu bwandi muna tangwa dya biwayi; kanfidinga mu tsi ya sombolu yandi; kantombula ha thandu ya tadi. 6Amana buthwena, mutwa wama wukatombulwa ha thandu ya bambeni bama bana banzyungini meni, amana yikátambika bimenga mu sombolu yandi yi ndinga za kyesi; yiyímbila amana yisika mikunga kwena Tata wama.
7Yuka ndinga yama, A Tata, tangwa yisi kalunga; ngyukila kyadi amana pheka mvutu. 8Mbundu yama yisi zonza kikuma kya ngeyi: «Sanda mbunzu yandi.» Mbunzu yaku, A Tata, yisi sanda. 9Wuswekaku mbunzu yaku kwena meni; wukatulaku musadi waku mu khabu—ngeyi wákala nsadisi wama. Wunyambulaku amana wundosilaku, A Tata, luhulusu lwama. 10Ho ni tata wama yi ngudi wama bándosila meni, Tata wama katámbula meni. a a v10 Ho ni lungongu lwa batu luna luluti bela-bela lwazimbala, Tata wetu kakutakanisa mwana wuna wáyambulwa mu nzu yandi meni—dyadi disongidila mbundu yandi kwena mwana wosu wa bana bandi.
11Ndonga nzila yaku, A Tata, amana ntwadisa mu nzila yalulama kikuma kya batu bana bisi ndeya. 12Wunyekulaku ku luzolu lwa bandwandwa bama, mukuma bambangi ba luvunu bálubuka mu kuntila, beka heyisa mvwalangani.
13Yenina yi kikumbwala mu dyadi: yikámona buweti bwa Tata wama mu tsi ya batu ba moya. 14Hingila Tata wetu; kala ngolu, amana mbundu yaku yibonga kikesa; hingila Tata wetu.
