Tata wisi kútikisa bana bandi bámwangana kuna nzu
Batu bisi hukumuka hanga mikoku mukuma bakalema ba bawu yi biteki bya nzu ya bawu babahanaku kima. Tata wetu wisi zonza ni khabu zandi zisi hya kwena bakalema bina; kakábokila bana bandi bámwangana, kakábavutula kuna nzu tuka ku Engipito yi ku Asuli, amana kakábavutwala, mukuma yandi yi Tata wa bawu.
Tata wetu kisi zonza mu mavese 3–12
10 1Lombenu mvula kwena Tata wetu muna tangwa dya mvula za ndendi—Tata wetu wuna wisi hanga matuti ma pfunzi; yandi wisi babaheka mvula za lawu, kwena mutu wosu mwangu watsi wa kilanga.
2Mukuma biteki bya nzu bisi zonza mambu makonda nata kima, amana banganga bisi mona luvunu; bisi tela ndosi za mbi amana bisi hana kikesa kya khatu. Buna batu bisi hukumuka hanga mikoku; bawu bisi mona phasi mukuma ka kalema ku.
3«Khabu zama zisi hya kwena bakalema, amana yihékila ndola bapfumu ba kibuka; mukuma Tata, Mukwa ngolu zoosu, watála kibuka kyandi, kanda dya Yuta, amana kabakitula hanga mvalu wandi wa khembu mu mvita.» 4Kwena yandi kwakwísa tadi dya mupfundila, kwena yandi ngunzi ya sombolu, kwena yandi buta dya mvita, kwena yandi pfumu zoosu ha kimosi. a a v4 Tadi dya mupfundila, ngunzi ya sombolu yina zitu dyosu disi kangama, pfumu wuna wisi tuka mu Yuta — Bulunda bwa Pha busi mutela Yesu, wuna Tata wetu wisi tungila batu bandi. 5Ha kimosi bawu bakála hanga basuta ba ngolu, bisi dyatikisa thoba ya mabala-bala mu mvita. Bawu bakanwána, mukuma Tata wetu kenina yi bawu, amana batu bana bazakala hana mvalu bakakwáta tsoni.
6«Yisyámisa kanda dya Yuta, amana Yihúlula kanda dya Yozefu. Yibavútula kuna nzu, mukuma mbundu yama yisi bamona kyadi, amana bakála hanga ni yisi balosa bawu; mukuma meni yenina Tata wa bawu, amana yíbavutwala. 7Buna Efwayimi kakála hanga musuta wa ngolu, amana mbundu za bawu zasángwala hanga ni mu vinu. Bana ba bawu bamóna byabina amana bakasangwála; mbundu za bawu zakála yi kyesi mu Tata wetu. 8“Yibasíkila phungi amana yibakútikisa bawu, mukuma yábahulula bawu, amana bakála balawu hanga bwákala khulu. 9Ata yibamwánga hana kati dya batu ba tsi, muna tsi za thama bakantébuka meni; bakazínga, ha kimosi yi bana ba bawu, amana bakavútuka. 10Yibavútula kuna nzu tukidila ku tsi ya Ngiphiti amana yibakútikisa tukidila ku Asiliya; Yibanata ku tsi ya Ngileyadi yi Lebanoni, tii yi kuna bawanaku hika homa kikuma kya bawu. 11Bakahíta mu yanga dya mbuta dya phasi; kabeta makaka ma yanga dya mbuta, amana madingu moosu ma Nili máyumuka. Lulendu lwa Asiliya lwakulwámina, amana koka dya luyalu dya Ngiphiti dyalúta.” 12Yibasyámisa mu meni, amana mu khumbu yama bakadyáta,» kazimbula Tata wetu.
