Kibuka kya mikoku kina kyáyadikila mu kuhondwa
Mu ndinga ya Tata wandi, Zakadiya wisi hanga kisalu kya kalema ha thandu ya kibuka kya mikoku kina kyáyadikila mu kuhonda, wisi bula makoka mandi modi, Khenda yi Kithwadi, amana wisi fútulwa makuta makumatatu ma palata, malubulwa kwena mubumbi. Mana malanda yenina kalema wakonda mupfunu wuna wisi dya kibuka kya mikoku.
Tata wetu kisi zonza mu mavese 4–6, 13, 15–17
11 1Yafulula mwelu myaku, Lebanoni, ndangu mbawu yiyoka miti myaku mya sedeli! 2Dila, siphele, mukuma sedeli dyabwa, miti mya lukumu myazíluka! Dila, miti mya oke mya Bashani, mukuma musitu wunene wábwa! 3Yuka miyananu mya bakalema, mukuma khembu ya bawu yazíluka! Yuka midumu mya bana ba bathambu, mukuma musitu wa Yolutani wazíluka!
4Tata wama wuzimbudi bwabu: Hungula kibuka kya mikoku kina kyáyadikila mu kuhonda.
5Basumbi ba bawu babahonda konda pfundusu; bateki ba bawu bazimbula: «Nzambi kazatulwa, yékituka mvwama!» amana bakalema ba bawu meni babáyukilaku kyadi. 6Mukuma kiyukilaku diaka batu ba tsi kyadi, kazimbudini Tata wetu. Tala, yilambula mutu wosu mu koku dya mukwandi yi mu koku dya kinga kyandi; bakákamutuna tsi, amana ka mutu ku yikaphulula mu koku dya bawu.
7Buna yáhungula kibuka kya mikoku kina kyáyadikila mu kuhonda, mikoku mina myáluta mu kuyamiswa. Yábonga makoka modi, yáheka dimosi khumbu «Khenda» yi dyakwawu «Kithwadi», amana yáhungula kibuka kya mikoku. 8Mu ngonda mosi yákatula bakalema batatu. Mbundu yama yázyoka kikuma kya bawu, amana bawu phi bámmenga meni. a a v8 Bakalema batatu bana ka mutu ku kabazayi; ka mbanzulu yimosi ya balongi ku yánungini mu kukwikilwa kwena boosu. 9Buna yázimbula: «Kikaluhungulaku. Bana bena mu kufwa, bafwa; bana bena mu kuzangana, bazangana; amana bana basala, badivukula mbisi ya bakwawu.»
10Yábonga koka dyama «Khenda» amana yádibukuna, mu kubukuna bulunda buna yíta yi makanda moosu. 11Buna bwábukumuka muna kilumbu kina, amana batsukami ba kibuka kya mikoku bana bakala kutala meni bázaya ni mama makála ndinga ya Tata wetu. 12Yábazimbula: «Yuka ni lumoni bukheti, luheka meni lufutu lwama; yuka ni heku, lusisa lwawu.» Buna bátanga lufutu lwama: makuta makumatatu ma phalata. b b v12 Makuta makumatatu mama ma phalata, mawu kyedika thalu yina Lukanu lwa Pha lutelini ni makuta mana máfutwa mu kuyekula Yesu (Matayo 27:9-10).
13Buna Tata wetu wunzimbwadi: «Losa dyawu kwena mubumbi wa tuma» — thalu yinene yina bánthadila meni! Buna yábonga makuta makumatatu ma phalata amana yámalosa muna nzu ya Tata wetu, kwena mubumbi wa tuma.
14Buna yábukuna koka dyama dyazodi, «Kithwadi», mu kuzanga kiphangi kina kyákala hana kati dya Yuta yi Kiseledi.
15Buna Tata wetu wunzimbwadi: «Bonga diaka bisalulu bya kalema wa kilawu. 16Mukuma, tala, yifutumuna kalema mosi muna tsi, wuna kakakéba bana bena mu kutota ku, kakasanda bana bámwangana ku, kakabuka bana bábukuka ku, kakadisa bana bakola mu lutu ku; kaasi kakadya mbisi ya bana ba mafuta amana kakwanga biyadu bya bawu. 17Mabela kwena kalema wama wa khatu, wuna wayekula kibuka kya mikoku! Mbedi yibwa ha koku dyandi amana ha disu dyandi dya kitata! Koku dyandi diyumuka kyosu, amana disu dyandi dya kitata dikituka phofu kyosu!»
