Mutu wenina yi musinga wa kutesa
Mutu wasimba musinga wa kutesa wayandika kutesa Yelusalemi, amana wazimbulwa ni kalembwa — mbanza kakala hanga tsi yakonda luphangu. Tata wetu yandi-meni kakala kibaka kya mbawu kya kuzingila yawu yi khembu mu kati dya yawu, amana makanda malawu makwisa dinama yi yandi amana makituka bana bandi.
Tata wetu kisi zonza mu mavese 5–7, 10–12
2 1Amana yátemuna mesu amana mboni mutu wenina yi musinga wa kutesa mu koku dyandi. 2Amana yáhyula: «Kwe wukwenda?» Yandi wunzimbwadini: «Yikwenda tesa Yelusalemi, hanga yamona buna kenina wa mbuta yi buna kenina wa nda.»
3Amana wanzyo wuna wakala zonza yi meni wákatuka, amana wanzyo wahika wálubuka mu kumutundakana, 4amana wumuzimbwadini: «Tyakula, zimbula kwena ngunza yandu: “Yelusalemi kazínga hanga tsi yakonda luphangu, kikuma kya batu balawu yi bibulu byalawu bina byakála mwena yawu.”
5“Meni-meni yikála kibaka kya mbawu kya kuzingila yawu, kazimbudini Tata wetu, amana yikála khembu mwena yawu.”»
6«Yizenu! Yizenu! Tinenu ku tsi ya londi, kazimbudini Tata wetu, mukuma yílumwanga hanga pfunzi ziya za zilu, kazimbudini Tata wetu. 7Yiza, Siyoni! Huluka, ngeyi wuna wenina zingila yi mwana wa ndumba wa Babiloni.
8Tala mana kazimbula Tata Mukwa ngolu zoosu, kunima dya khembu yandi kuthuma kwena makanda mana máluyiba: wosu wuna wukúsimba ngeyi, wasímba disu dyandi.
9Mukuma tala, yikákhukumuna koku dyama ha thandu ya bawu, amana bakála bima bya kuyiba kwena bana babasadila. Buna lwazáya ni Tata Mukwa ngolu zoosu wáthuma.
10Yimbila yi sangwala, mwana wa ndumba wa Siyoni! Mukuma tala, yikwísa zingila mu kati dya benu, kazimbudini Tata wetu.
11“Makanda malawu makála kukhundakana yi Tata wetu mu kilumbu kina amana makála bana bama. Yikála zingila mu kati dya benu, amana lwazáya ni Tata Mukwa ngolu zoosu wáthuma kwena benu. 12Amana Tata wetu kabónga Yuta hanga ndambu yandi mu tsi ya bukheti, amana kavútuka kusola Yelusalemi.
13Dibatenu, benu batu boosu, ku thwala ya Tata wetu, mukuma kavuyuka tuka ku homa handi ha bukheti.”»
