Àwọn Orílẹ̀-èdè Dìtẹ̀ Sí Ọ
Orin kan. Saamu ti Asafu.
Ẹgbẹ́ àjọṣepọ̀ kan — Edomu, Moabu, Ammoni, Assiria àti àwọn mìíràn — ti fohùn ṣọ̀kan láti pa orúkọ Israẹli rẹ́ pátápátá. Asafu dárúkọ ọ̀kọ̀ọ̀kan wọn, ó béèrè fún ìṣẹ́gun tí ó dé bá Midiani, lẹ́yìn náà ó béèrè fún ìtìjú tí yóò mú wọn wá orúkọ Baba wa.
83 1Baba wa, má ṣe dákẹ́; má ṣe pa ẹnu rẹ mọ́, bẹ́ẹ̀ ni má ṣe dúró jẹ́ẹ́, Baba wa. 2Nítorí wò ó, àwọn ọ̀tá rẹ ń pariwo; àwọn tí ó kórìíra rẹ ti gbé orí wọn sókè. 3Sí àwọn ènìyàn rẹ ni wọ́n ń gbìmọ̀ ní ìkọ̀kọ̀; wọ́n jọ ń dìtẹ̀ sí àwọn tí o kà sí iyebíye. 4Wọ́n wí pé, “Ẹ wá, ẹ jẹ́ kí a pa wọ́n rẹ́ kúrò bí orílẹ̀-èdè; kí a má sì rántí orúkọ Israẹli mọ́.” 5Pẹ̀lú ọkàn kan ni wọ́n ń dìtẹ̀; wọ́n dá májẹ̀mú sí ọ, 6àwọn àgọ́ Edomu àti àwọn ọmọ Iṣmaeli, Moabu àti àwọn ọmọ Hagari, 7Gebali àti Ammoni àti Amaleki, Filistia pẹ̀lú àwọn olùgbé Tire. 8Asiria pẹ̀lú ti darapọ̀ mọ́ wọn; wọ́n ti di apá alágbára fún àwọn ọmọ Lotu.
9Ṣe sí wọn gẹ́gẹ́ bí o ti ṣe sí Midiani, gẹ́gẹ́ bí o ti ṣe sí Sisera àti Jabini ní odò Kiṣoni, 10àwọn tí a parun ní Eni-dori, tí wọ́n sì di ìgbẹ́ fún ilẹ̀. 11Sọ àwọn ọlọ́lá wọn dàbí Orebu àti Seebu, gbogbo àwọn ọmọ-ọba wọn dàbí Seba àti Salmunna, 12àwọn tí ó wí pé, “Ẹ jẹ́ kí a gba fún ara wa àwọn ibùjẹ ẹran ti Ọlọ́run.” 13Baba mi, sọ wọ́n dàbí eruku tí ń yípo, dàbí ìyàngbò níwájú afẹ́fẹ́. 14Gẹ́gẹ́ bí iná ti ń jó igbó run, gẹ́gẹ́ bí ọwọ́ iná ti ń dáná sun àwọn òkè, 15bẹ́ẹ̀ ni kí o fi ìjì rẹ lépa wọn, kí o sì fi ẹ̀fúùfù líle rẹ dẹ́rù bà wọ́n. 16Fi ìtìjú bo ojú wọn, kí wọ́n lè wá orúkọ rẹ, Baba wa. 17Kí ojú kí ó tì wọ́n, kí wọ́n sì rẹ̀wẹ̀sì títí láé; kí wọ́n ṣègbé nínú àbùkù, 18kí wọ́n lè mọ̀ pé ìwọ nìkan ṣoṣo, ẹni tí orúkọ rẹ̀ ń jẹ́ Baba wa, ni Ọ̀gá-ògo jùlọ lórí gbogbo ayé.
