ድንጋዩ ተንከባልሎ ተወግዷል

ማርያም ድንጋዩ ተነሥቶ ታገኛለች፤ ስሟን እስኪጠራ ድረስም አትክልተኛው መስሏት ነበር። ወደ አባቴና ወደ አባታችሁ ዐርጋለሁ የሚለውን መልእክት ይዛ እንድትሄድ ይልካታል። በሩን ዘግተው በተቀመጡት ደቀ መዛሙርት ላይ መንፈስን እፍ ይላል፣ ቶማስም ቍስሎቹን እንዲነካ ይፈቅድለታል።

ምዕራፍ 20።

ከሳምንቱ በመጀመሪያው ቀን ማለዳ፣ ገና ጨለማ ሳለ፣ መግደላዊት ማርያም ወደ መቃብሩ መጥታ ድንጋዩ ከመቃብሩ ተወግዶ አየች። ስለዚህ ሮጣ ወደ ስምዖን ጴጥሮስና ኢየሱስ ይወደው ወደ ነበረው ወደ ሌላው ደቀ መዝሙር መጥታ፣ “ጌታን ከመቃብሩ ወስደውታል፤ የት እንዳኖሩትም አናውቅም” አለቻቸው።

ስለዚህ ጴጥሮስና ሌላው ደቀ መዝሙር ተነሥተው ወደ መቃብሩ ሄዱ። ሁለቱም አብረው ይሮጡ ነበር፤ ሌላው ደቀ መዝሙር ግን ከጴጥሮስ ይልቅ ፈጥኖ ስለ ሮጠ መጀመሪያ ወደ መቃብሩ ደረሰ። ጎንበስ ብሎም የተልባ እግር ልብሶቹ ተቀምጠው አየ፤ ወደ ውስጥ ግን አልገባም። ተከትሎት የመጣው ስምዖን ጴጥሮስም ደርሶ ወደ መቃብሩ ገባ፤ የተልባ እግር ልብሶቹም ተቀምጠው አየ፤ በራሱ ላይ የነበረውም ጨርቅ ከተልባ እግር ልብሶቹ ጋር ሳይሆን ተጠቅልሎ ለብቻው በአንድ ስፍራ ተቀምጦ ነበር። መጀመሪያ ወደ መቃብሩ የደረሰው ሌላውም ደቀ መዝሙር ያን ጊዜ እርሱ ደግሞ ገባ፤ አይቶም አመነ። ከሙታን ተለይቶ መነሣት እንዳለበት የሚናገረውን መጽሐፍ ገና አልተረዱም ነበርና።

ከዚያም ደቀ መዛሙርቱ ወደ ቤታቸው ተመለሱ። ማርያም ግን እያለቀሰች ከመቃብሩ ውጭ ቆማ ነበር። ስታለቅስም ወደ መቃብሩ ውስጥ ለማየት ጎንበስ አለች።

አባቴና አባታችሁ

የኢየሱስ ሥጋ ተኝቶበት በነበረበት ስፍራ ነጭ ልብስ የለበሱ ሁለት መላእክት፣ አንዱ በራስጌ አንዱም በግርጌ ተቀምጠው አየች። እነርሱም፣ “አንቺ ሴት፣ ለምን ታለቅሻለሽ?” አሏት። እርሷም፣ “ጌታዬን ወስደውታል፤ የት እንዳኖሩትም አላውቅም” አለች።

ይህን ብላ ዘወር ስትል ኢየሱስ ቆሞ አየች፤ ኢየሱስ መሆኑን ግን አላወቀችም።

ኢየሱስም፣ “አንቺ ሴት፣ ለምን ታለቅሻለሽ? ማንንስ ትፈልጊያለሽ?” አላት። እርሷም የአትክልቱ ጠባቂ መስሎአት፣ “ጌታ ሆይ፣ አንተ ወስደኸው ከሆነ የት እንዳኖርኸው ንገረኝ፤ እኔም እወስደዋለሁ” አለች።

ኢየሱስም፣ “ማርያም” አላት። እርሷም ዘወር ብላ በአራማይክ፣ “ረቦኒ!” አለችው፤ ይህም “መምህር” ማለት ነው።

ኢየሱስም፣ “ገና ወደ አብ ስላላረግሁ አትያዢኝ። ነገር ግን ወደ ወንድሞቼ ሄደሽ፣ ‘ወደ አባቴና ወደ አባታችሁ ዐርጋለሁ’ ብለሽ ንገሪአቸው” አላት። ^a

መግደላዊት ማርያም ሄዳ ለደቀ መዛሙርቱ፣ “ጌታን አየሁ” ብላ ነገረቻቸው፤ ይህንም እንዳላት ነገረቻቸው።

ሰላም ለእናንተ ይሁን

በዚያኑ ዕለት ማታ፣ ከሳምንቱ በመጀመሪያው ቀን፣ ደቀ መዛሙርቱ ከአይሁድ መሪዎች ፍርሃት የተነሣ ደጆቹ ተቈልፈው በነበሩበት ስፍራ ኢየሱስ መጥቶ በመካከላቸው ቆመና፣ “ሰላም ለእናንተ ይሁን” አላቸው።

ይህንም ብሎ እጆቹንና ጎኑን አሳያቸው። ደቀ መዛሙርቱም ጌታን አይተው ደስ አላቸው።

ኢየሱስም ዳግመኛ፣ “ሰላም ለእናንተ ይሁን። አብ እንደ ላከኝ፣ እኔም እንዲሁ እልካችኋለሁ” አላቸው። ይህንም ብሎ እፍ አለባቸውና፣ “መንፈስ ቅዱስን ተቀበሉ። የማንም ሰው ኀጢአት ይቅር ብትሉ ይቅር ተብሎለታል፤ ለማንም ይቅርታን ብትከለክሉ ተከልክሏል።”

ቶማስ ከእነርሱ ጋር አልነበረም

መንታ የተባለው፣ ከዐሥራ ሁለቱ አንዱ የሆነው ቶማስ ግን ኢየሱስ በመጣ ጊዜ ከእነርሱ ጋር አልነበረም። ሌሎቹ ደቀ መዛሙርት፣ “ጌታን አይተነዋል!” እያሉ ይነግሩት ነበር። እርሱ ግን፣ “በእጆቹ የችንካሩን ምልክት ካላየሁ፣ ጣቴንም በችንካሩ ምልክት ውስጥ ካላስገባሁ፣ እጄንም በጎኑ ውስጥ ካላስገባሁ፣ ከቶ አላምንም” አላቸው።

ከስምንት ቀን በኋላ ደቀ መዛሙርቱ እንደ ገና በቤት ውስጥ ነበሩ፤ ቶማስም ከእነርሱ ጋር ነበር። ደጆቹ ተቈልፈው ሳሉ ኢየሱስ መጥቶ በመካከላቸው ቆመና፣ “ሰላም ለእናንተ ይሁን” አለ። ከዚያም ቶማስን፣ “ጣትህን ወደዚህ አምጣ፤ እጆቼን እይ። እጅህንም ዘርግተህ በጎኔ ውስጥ አግባ። መጠራጠርን ትተህ እመን” አለው።

ቶማስም መልሶ፣ “ጌታዬና አምላኬ!” አለው።

ኢየሱስም፣ “ስላየኸኝ አመንህ? ሳያዩ የሚያምኑ ብፁዓን ናቸው” አለው።

ይህ ለምን እንደ ተጻፈ

ኢየሱስ በዚህ መጽሐፍ ያልተጻፉ ሌሎች ብዙ ምልክቶችን በደቀ መዛሙርቱ ፊት አደረገ። እነዚህ ግን ኢየሱስ እርሱ ክርስቶስ፣ የአባታችን ልጅ መሆኑን እንድታምኑ፣ አምናችሁም በስሙ ሕይወትን እንድታገኙ ተጽፈዋል።