Hesheherü Thelü Tho Melu Kesüko

Jobe uko ce mütü hesheherü thelü tho melu kesüko zo zi po, mu uko leko a leko thade lize, I ri neko biti posü ketola zi po. Pü Jihova phiketa thüma bi tho süva, a volü tü die a nyophu va, mu a metsulü kengu püva. Süzori, a mika kepütho tüyolü ba zo zi pü lhü seba.

Kezhü 16.

Süsa Jobe kela kesü die poti, I hiko bi thinyi kükro seta; neko mütü hesheherü thelü tho melu kesüko zo. Neko füphra po hiko tha kümosa me? Dipü neko lüda sü die neko kela kesü süzü ba? Neko a tülü ba lize, I ri neko biti posü ketola; I neko metsu po kükhu külhü sü ta die neko ce a mbo mününu ketola. Vele I a talü neko kemetü sü ketola, mu a mülü thelü tho melu kesü neko kemezhe thelü sü ketola. I po lize, a kemezhe thelümo; mu I kethü lize, dipü a lüno prata? Tsüsa Jihovae a kebü sü tala; noe a khretho mütü müka va. Noe a khasü tala, mu hio zhopo kethi thita; a kekhu thita kesü a metsu tasü die a mhü zalü zhopo thiva. Pü lüda a khrü sü ta die a merho sü ta; Pü a ce pü hu thüzhe va; a metsuketao a mhü kemetüpü pe bata. Thümakoe u talü a ce khriva; mesakemo sü u a bro vüva; uko a metsulü kengu püva. Jihovae a jütho kemoko ce belü süva die kürüzüko be lü a kügü va. I nela bade, vele püe a prüva; pü a volü tü die a nyophu va; pü a pü kelapü thi süva. Pü thekümikoe a hu püva; pü phimezhe kümo sü a pülü khrikhro süva; mu a gallio cejülü lhu va. Pü a tsübi tsübi sü a prüva; pü riwhümi biti a ce rushüh va. I a mpa lü gakhrofü thiva, mu a mbo nyophalü khrü va. A krakezhü a mhü küreva, mu a mhükhrolü keso khri kümüzü yopüh bata, Murimu kümo bale, a belü, mu a prayi mesa zo. Cejü, a thizü hu tahite, mu a se kerelü ngoyi mute. Tsüsahi, a zhopothi tüyolü bazo, mu a ukil kümathoyo tü pilü bazo. A khretho miko a nümo thi; a mhü Jihova ce mhüdzü kra. thümapü sheri Jihova zü küba pü mezhemelo sü baküyi, thümanuoe pü sühzanumi lü mezhemelo sü biti. Kekrelamori zho tsari zota ri ditato, süsa I retu mo tüpü lü votato.