ਜ਼ਬੂਰ 43

43 ¹ਹੇ ਮੇਰੇ ਪਿਤਾ, ਮੇਰਾ ਨਿਆਂ ਕਰੋ, ਅਤੇ ਇੱਕ ਬੇਵਫ਼ਾ ਕੌਮ ਦੇ ਵਿਰੁੱਧ ਮੇਰੇ ਮੁਕੱਦਮੇ ਦੀ ਪੈਰਵੀ ਕਰੋ; ਧੋਖੇਬਾਜ਼ ਅਤੇ ਬੇਇਨਸਾਫ਼ ਮਨੁੱਖ ਤੋਂ ਮੈਨੂੰ ਛੁਡਾਓ। ²ਕਿਉਂ ਜੋ ਤੁਸੀਂ ਮੇਰੇ ਪਿਤਾ, ਮੇਰੇ ਗੜ੍ਹ ਹੋ। ਤੁਸੀਂ ਮੈਨੂੰ ਕਿਉਂ ਤਿਆਗ ਦਿੱਤਾ ਹੈ? ਮੈਂ ਵੈਰੀ ਦੇ ਸਤਾਏ ਹੋਏ, ਉਦਾਸੀ ਵਿੱਚ ਕਿਉਂ ਫਿਰਾਂ? ³ਆਪਣਾ ਚਾਨਣ ਅਤੇ ਆਪਣੀ ਸਚਿਆਈ ਭੇਜੋ; ਉਹ ਮੇਰੀ ਅਗਵਾਈ ਕਰਨ; ਉਹ ਮੈਨੂੰ ਤੁਹਾਡੇ ਪਵਿੱਤਰ ਪਰਬਤ ਤੱਕ ਲੈ ਆਉਣ, ਤੁਹਾਡੇ ਵਾਸ ਕਰਨ ਦੇ ਸਥਾਨ ਤੱਕ। ⁴ਤਦ ਮੈਂ ਸਾਡੇ ਪਿਤਾ ਦੀ ਜਗਵੇਦੀ ਕੋਲ ਜਾਵਾਂਗਾ, ਉਸ ਕੋਲ, ਜੋ ਮੇਰੀ ਸਭ ਤੋਂ ਵੱਡੀ ਖ਼ੁਸ਼ੀ ਹੈ; ਅਤੇ ਮੈਂ ਬਰਬਤ ਨਾਲ ਆਪਣੇ ਪਿਤਾ ਦੀ ਉਸਤਤ ਕਰਾਂਗਾ। ⁵ਹੇ ਮੇਰੀ ਜਾਨ, ਤੂੰ ਕਿਉਂ ਉਦਾਸ ਹੈਂ, ਅਤੇ ਮੇਰੇ ਅੰਦਰ ਕਿਉਂ ਵਿਆਕੁਲ ਹੈਂ? ਸਾਡੇ ਪਿਤਾ ਉੱਤੇ ਆਸ ਰੱਖ; ਕਿਉਂ ਜੋ ਮੈਂ ਹਾਲੇ ਵੀ ਉਸ ਦੀ ਉਸਤਤ ਕਰਾਂਗਾ, ਜੋ ਮੇਰੀ ਮੁਕਤੀ ਅਤੇ ਮੇਰੇ ਪਿਤਾ ਹਨ।