Sɛ Anka Mitumi Hu No A
Hiob pɛ asɛnniiɛ, ɛnyɛ ɔko. Sɛ ɔbɛhunu baabi a Onyankopɔn te a, anka ɔbɛka n'asɛm akyerɛ no na wɔagyae no. Nanso Onyankopɔn nni apueeɛ anaa atɔeeɛ, na ɔyɛ deɛ ɛsɔ n'ani. Hiob ka sɛ ɔbɛfiri mu aba sɛ sika kɔkɔɔ, nanso ehu da so ka no.
23 1Afei Hiob buae se: 2“Nnɛ mpo mʼanwiinwii yɛ nwononwono; ne nsa yɛ duru me so, ɛmfa ho sɛ meresi apini. 3Ao, sɛ anka minim baabi a mɛhu no a, anka mɛkɔ ne tenabea hɔ! 4Anka mede mʼasɛm bɛto nʼanim, na mede akyinnyegye ahyɛ mʼano ma. 5Anka mɛte nsɛm a ɔde bɛbua me no ase, na mahu nea ɔbɛka akyerɛ me. 6Ɔde ne tumi kɛse no bɛne me agye akyinnye anaa? Dabi—ampa ara ɔbɛtie me. 7Ɛhɔ na onipa tenenee betumi ne no adwen asɛm, na me temmufo bebu me bem daa. 8Nanso sɛ mekɔ apuei fam a, ɔnni hɔ; na sɛ mekɔ atɔe fam a, minhu no. 9Bere a ɔreyɛ adwuma wɔ atifi fam no, minhu no; bere a ɔdan kɔ anafo fam no, minnya no. 10Nanso onim ɔkwan a mefa so; sɛ ɔsɔ me hwɛ wie a, mɛpue sɛ sika kɔkɔɔ. 11Me nan adi nʼanammɔn akyi pintinn; madi nʼakwan so, na mamman. 12Mantwe me ho amfi nʼanofafa ahyɛde ho; makora nʼano nsɛm sen me daa aduan. 13Nanso ɔnsesa—hena na obetumi asan no? Nea ɔpɛ biara no, ɔyɛ. 14Efisɛ ɔbɛyɛ nea wahyɛ ama me no, na saa nneɛma yi bi pii wɔ nʼadwene mu. 15Ɛno nti na ehu aka me wɔ nʼanim; sɛ medwene ho a, misuro no. 16Onyankopɔn ama me koma abotow; Otumfo ama ehu aka me. 17Nanso esum no ntumi mma me nyɛ komm, esum kabii a akata mʼanim no.”
