Khengu ya Isi-Boseti
Bapfumu bodi ba bibuka bya mvita bya Isi-Boseti meni bámutumbula mu suku dyandi muna vunda kwandi kwa mwini, amana bánata mutwa wandi ku Heveloni, mu kutela mawu mbela za Tata wetu. Tavidi, wuna wáhonda mutu wuna wázimbula ni yandi wáhonda Sawulu, wábahonda. Mutwa bawunata ku kifulu kya Abeneli.
4 1Muna tangwa Isi-Boseti, mwana wa Sawulu, kayúka ni Abeneli wáfwa ku Heveloni, kikesa kyandi kyázimbakana, amana batu boosu ba Kiseledi báníkana. 2Mwana wa Sawulu wákala yi bapfumu bodi ba bibuka bya mvita: Baana yi Lekabi, bana ba Limoni mwisi Beeloti, ba kanda dya Benzyame—mukuma Beeloti dyawu phi ditangama hanga kitini kya Benzyame, 3mukuma bisi Beeloti bátina ku Gitayimi amana bázinga kwakuna hanga banzenza tii yi lelu.
4Yonatani, mwana wa Sawulu, wákala yi mwana wa yakala wawokumuka malu modi. Wákala yi mvula matanu muna tangwa tsangu ya Sawulu yi Yonatani yátuka ku Yizeleli; mukhetu wuna wakala mulunda wámukwata ndangu katina, kaasi muna kutina kwandi thinu, mwana wábwa amana wákituka kikata. Khumbu yandi Mefiboseti.
5Lekabi yi Baana, bana ba Limoni mwisi Beeloti, bisa ku nzu ya Isi-Boseti muna mwini wa tangwa, tangwa kakala vunda mu tsinzi. 6Bákota ha kati dya nzu bwosu bazodi bonga bule, bámutumbula mu kundu, amana Lekabi yi phangi yandi Baana báhuluka. 7Bákotila mu nzu tangwa Isi-Boseti kakala landalala hana thangi yandi muna suku dyandi dya kuleka. Bámubeta, bámuhonda, bázenga mutwa wandi amana bánata, bendi mu phipha yosu mu nzila ya Alaba. 8Bánata mutwa wa Isi-Boseti kwena Tavidi ku Heveloni amana bázimbula kwena kyamvu: «Ayawu mutwa wa Isi-Boseti, mwana wa Sawulu, mbeni waku wuna wásanda luzingu lwaku. Lelu Tata wetu wávutula mbela ya pfumu wama kyamvu kwena Sawulu yi butuka dyandi.» a a v8 Bahondi basi tala ni Tata wetu wuhangidi dyambu dya bawu dya mbi, kaasi mvutu yandi yisi kwisa mu nzila ya Tavidi, wuna wubafundisa hanga bahondi ba mutu wakonda bila.
9Kaasi Tavidi wávutula kwena Lekabi yi phangi yandi Baana, bana ba Limoni mwisi Beeloti: «Kyedika bwosu Tata wetu kenina moya, wuna wáhulula luzingu lwama mu biwayi byosu, 10muna tangwa mutu mosi wunzimbwadini: “Tala, Sawulu wáfwa”, wabánza ni wunata tsangu yambote, yámukwata amana yámuhonda ku Sikilagi. Kyakina kyákala lufutu yámuheka kikuma kya tsangu yandi! 11Buwombo lawu, buna, yuka ni batu ba mbi báhonda mutu wa masonga muna nzu yandi meni, hana thangi yandi meni—keti yifwaniku, buthwena, kulomba menga mandi kwena benu amana kulukatula ha tsi? 12Tavidi wáthuma bangunza bandi, amana bábahonda, bázenga moku yi malu ma bawu, amana bákhoka bamvumbi ba bawu bela-bela yi kiziba kya Heveloni. Kaasi mutwa wa Isi-Boseti bawuzika mu dizyamu dya Abeneli ku Heveloni.»
